guman hai barq-e-tapan ko shayad idhar wo azm-e-jawan nahin hai

gumāñ hai barq-e-tapāñ ko shāyad idhar vo azm-e-javāñ nahīñ hai

jo bāl-o-par haiñ mire salāmat to āshiyāna kahāñ nahīñ hai

mire jinnoñ se sañvar ga.ī hai urūs-e-daurāñ kī zulf-e-pur-ḳham

na ho jo rangīñ lahū se mere kahīñ koī dāstāñ nahīñ hai

huuñ ḳhud hī maiñ ḳhūgar-e-havādis jo mauj-e-tūfāñ se kheltā huuñ

ġhalat samajhte haiñ ahl-e-sāhil safīna-o-bādbāñ nahīñ hai

maiñ dasht-e-pur-haul tak gayā huuñ talāsh-e-manzil meñ pā-ba-jaulāñ

junūn-e-vārafta merā hargiz asīr-e-kū-e-butāñ nahīñ hai

nizām-e-mai-ḳhāna munhasir hai pasand-e-rindān-e-bāda-kash par

ḳhilāf-e-jamhūr-e-mai-kada ho bahāl pīr-e-muġhāñ nahīñ hai

guman hai barq-e-tapan ko shayad idhar wo azm-e-jawan nahin hai

jo baal-o-par hain mere salamat to aashiyana kahan nahin hai

mere jinnon se sanwar gai hai urus-e-dauran ki zulf-e-pur-KHam

na ho jo rangin lahu se mere kahin koi dastan nahin hai

hun KHud hi main KHugar-e-hawadis jo mauj-e-tufan se khelta hun

ghalat samajhte hain ahl-e-sahil safina-o-baadban nahin hai

main dasht-e-pur-haul tak gaya hun talash-e-manzil mein pa-ba-jaulan

junun-e-warafta mera hargiz asir-e-ku-e-butan nahin hai

nizam-e-mai-KHana munhasir hai pasand-e-rindan-e-baada-kash par

KHilaf-e-jamhur-e-mai-kada ho bahaal pir-e-mughan nahin hai