gumnam Dare baiThe hain me’mar ghazal ke

gumnām Dare baiThe haiñ me’mār ġhazal ke

choroñ ne sajā rakkhe haiñ bāzār ġhazal ke

piite haiñ lahū merā jab ash'ār ġhazal ke

tab jā ke chamak paate haiñ ruḳhsār ġhazal ke

is darja asar-dār haiñ ash'ār ġhazal ke

farzāne liye baiThe haiñ aḳhbār ġhazal ke

chheḌā jo tarannum to thirakne lagīñ sāñseñ

jazboñ kā badan chhūne lage taar ġhazal ke

'iqbāl' kā ho vaqt ki 'ḳhusrav' kā zamāna

har daur meñ gesū rahe ḳhamdār ġhazal ke

behtar haiñ sabhī sinf-e-suḳhan apnī jagah par

lekin mire jazbāt haiñ bīmār ġhazal ke

jis roz se nāzil huī she'roñ pe javānī

mafhūm hue aur bhī tah-dār ġhazal ke

jab hogī mire zehn ke malbe kī khudā.ī

rag-rag meñ mirī nikleñge āsār ġhazal ke

jiddat na rivāyat na fasāhat na balāġhat

aise bhī kahe jaate haiñ ash'ār ġhazal ke

gumnam Dare baiThe hain me’mar ghazal ke

choron ne saja rakkhe hain bazar ghazal ke

pite hain lahu mera jab ash'ar ghazal ke

tab ja ke chamak pate hain ruKHsar ghazal ke

is darja asar-dar hain ash'ar ghazal ke

farzane liye baiThe hain aKHbar ghazal ke

chheDa jo tarannum to thirakne lagin sansen

jazbon ka badan chhune lage tar ghazal ke

'iqbaal' ka ho waqt ki 'KHusraw' ka zamana

har daur mein gesu rahe KHamdar ghazal ke

behtar hain sabhi sinf-e-suKHan apni jagah par

lekin mere jazbaat hain bimar ghazal ke

jis roz se nazil hui she'ron pe jawani

mafhum hue aur bhi tah-dar ghazal ke

jab hogi mere zehn ke malbe ki khudai

rag-rag mein meri niklenge aasar ghazal ke

jiddat na riwayat na fasahat na balaghat

aise bhi kahe jate hain ash'ar ghazal ke