gumrahi se yun kamal-e-agahi tak aa gae

gumrahī se yuuñ kamāl-e-āgahī tak aa ga.e

ham bahut bhaTke magar terī galī tak aa ga.e

in charāġhoñ ko batā do niiñd se jāgeñ zarā

baḌhte baḌhte ab añdhere raushnī tak aa ga.e

zor se hañsne lage phir umr ke sab māh-o-sāl

ham ne ye pūchhā thā kyā ham zindagī tak aa ga.e

jo kahā maiñ ne vahāñ tak koī bhī pahuñchā nahīñ

an-sunī karte hue sab an-kahī tak aa ga.e

zindagī ke har qadam par ik nayā bikhrāv hai

ham baḌī tartīb se be-rah-ravī tak aa ga.e

ik na.e mafhūm se tahrīr karnā hai unheñ

bahte bahte ab mire aañsū ḳhushī tak aa ga.e

har amal kā lāzmī hotā hai ik radd-e-amal

ab fareb us ke mirī sāda-dilī tak aa ga.e

ḳhatm hotī hī nahīñ 'ḳhālid' ujāloñ kī talāsh

dhuup se hote hue ham chāñdnī tak aa ga.e

gumrahi se yun kamal-e-agahi tak aa gae

hum bahut bhaTke magar teri gali tak aa gae

in charaghon ko bata do nind se jagen zara

baDhte baDhte ab andhere raushni tak aa gae

zor se hansne lage phir umr ke sab mah-o-sal

hum ne ye puchha tha kya hum zindagi tak aa gae

jo kaha main ne wahan tak koi bhi pahuncha nahin

an-suni karte hue sab an-kahi tak aa gae

zindagi ke har qadam par ek naya bikhraw hai

hum baDi tartib se be-rah-rawi tak aa gae

ek nae mafhum se tahrir karna hai unhen

bahte bahte ab mere aansu KHushi tak aa gae

har amal ka lazmi hota hai ek radd-e-amal

ab fareb us ke meri sada-dili tak aa gae

KHatm hoti hi nahin 'KHalid' ujalon ki talash

dhup se hote hue hum chandni tak aa gae