ghuncha chaTka na koi phul khila mere baad

ġhuncha chaTkā na koī phuul khilā mere baad

maiñ chalā to na chalī bād-e-sabā mere baad

zulm ke hāthoñ mire shahr se aane vaalo

aur kis kis kā vahāñ ḳhuun huā mere baad

hausla chāhiye gulshan kī nigahbānī kā

jāñ-nashīñ kaun mirā hogā bhalā mere baad

ye mirā ḳhūn-e-jigar hai ye mirā ḳhūn-e-jigar

husn ho jaa.e na muhtāj-e-hinā mere baad

dushmanī thī to faqat mere nasheman se thī

phir na aayā kabhī tūfān-e-balā mere baad

koī kahtā hai ye chupke se jagā kar mujh ko

kis ne duniyā meñ kiyā sajda adā mere baad

kaise kaise zarā maiñ bhī to sunūñ haañ kahiye

aap ko kaun vafādār milā mere baad

raah dushvār to manzil hai bahut duur abhī

kaash mil jaa.e koī rāh-numā mere baad

muskurātī jo kalī ḳhaar mahakte 'muḳhtār'

bāġhbāñ aisā chaman meñ na huā mere baad

ghuncha chaTka na koi phul khila mere baad

main chala to na chali baad-e-saba mere baad

zulm ke hathon mere shahr se aane walo

aur kis kis ka wahan KHun hua mere baad

hausla chahiye gulshan ki nigahbani ka

jaan-nashin kaun mera hoga bhala mere baad

ye mera KHun-e-jigar hai ye mera KHun-e-jigar

husn ho jae na muhtaj-e-hina mere baad

dushmani thi to faqat mere nasheman se thi

phir na aaya kabhi tufan-e-bala mere baad

koi kahta hai ye chupke se jaga kar mujh ko

kis ne duniya mein kiya sajda ada mere baad

kaise kaise zara main bhi to sunun han kahiye

aap ko kaun wafadar mila mere baad

rah dushwar to manzil hai bahut dur abhi

kash mil jae koi rah-numa mere baad

muskuraati jo kali KHar mahakte 'muKHtar'

baghban aisa chaman mein na hua mere baad