gunud-e-alam-e-imkan mein kahan ho jaun

gunūd-e-ālam-e-imkān meñ kahāñ ho jā.ūñ

jahāñ se hukm milā hai miyāñ vahāñ ho jā.ūñ

mire vajūd ko tartīb se rakhā huā hai

maiñ is libās se niklūñ to rā.egāñ ho jā.ūñ

shikasta-ḳhvāb kī dīvār par rakhā huā tū

agar charāġh samajh lo to bad-gumāñ ho jā.ūñ

sukūt ek taraf shor ik taraf rakh ke

lakīr khīñch ke donoñ ke darmiyāñ ho jā.ūñ

agar ḳhudā ne mujhe iḳhtiyār sauñp diyā

zamīn ḳhud pe lapeTūñ aur āsmāñ ho jā.ūñ

tamām raushnī sāñche meñ qaid karte vaqt

maiñ itnā tez sā chamkūñ ki sham.a-dāñ ho jā.ūñ

ajab junūn ne safhe pe aa liyā hai mujhe

fasāna likhte hue ḳhud kahāniyāñ ho jā.ūñ

ham ek saath jaleñ aag meñ magar yuuñ ho

ki tum to vaise raho aur maiñ dhuāñ ho jā.ūñ

maiñ vaise sher huuñ vo bhī daqīq lafzoñ kā

kyā tere vāste sāda-bayāniyāñ ho jā.ūñ

gunud-e-alam-e-imkan mein kahan ho jaun

jahan se hukm mila hai miyan wahan ho jaun

mere wajud ko tartib se rakha hua hai

main is libas se niklun to raegan ho jaun

shikasta-KHwab ki diwar par rakha hua tu

agar charagh samajh lo to bad-guman ho jaun

sukut ek taraf shor ek taraf rakh ke

lakir khinch ke donon ke darmiyan ho jaun

agar KHuda ne mujhe iKHtiyar saunp diya

zamin KHud pe lapeTun aur aasman ho jaun

tamam raushni sanche mein qaid karte waqt

main itna tez sa chamkun ki shama-dan ho jaun

ajab junun ne safhe pe aa liya hai mujhe

fasana likhte hue KHud kahaniyan ho jaun

hum ek sath jalen aag mein magar yun ho

ki tum to waise raho aur main dhuan ho jaun

main waise sher hun wo bhi daqiq lafzon ka

kya tere waste sada-bayaniyan ho jaun