ghurbat ko dafnana bhi aasan nahin

ġhurbat ko dafnānā bhī āsān nahīñ

shahr meñ koī sastā qabristān nahīñ

rah rah ke in patthar kī dīvāroñ meñ

ham bhī jaise patthar haiñ insān nahīñ

phir āñkhoñ meñ jal-thal sāvan bhādoñ sī

aur kahīñ bhī bārish kā imkān nahīñ

masḳh kiyā hai vaqt ne ik ik manzar ko

jaise ham ko rangoñ kī pahchān nahīñ

vaqt munāsib ḳhud se jaan chhuḌāne kā

lekin apne hāthoñ meñ hī jaan nahīñ

kyoñ dete ho dastak dil darvāze par

apnā ghar hai tum koī mehmān nahīñ

apnā nafā dekh ke bhī ye sochtā huuñ

is meñ aur kisī kā to nuqsān nahīñ

lutf huā phir ġhārat kashtī-rānī kā

aaj bhī dariyā meñ koī tūfān nahīñ

raunaq ḳhuub hai peḌoñ aur parindoñ kī

jangal be-shak jangal hai sunsān nahīñ

bilā-ijāzat jab chāho aa sakte ho

is darvāze par koī darbān nahīñ

ghurbat ko dafnana bhi aasan nahin

shahr mein koi sasta qabristan nahin

rah rah ke in patthar ki diwaron mein

hum bhi jaise patthar hain insan nahin

phir aankhon mein jal-thal sawan bhadon si

aur kahin bhi barish ka imkan nahin

masKH kiya hai waqt ne ek ek manzar ko

jaise hum ko rangon ki pahchan nahin

waqt munasib KHud se jaan chhuDane ka

lekin apne hathon mein hi jaan nahin

kyon dete ho dastak dil darwaze par

apna ghar hai tum koi mehman nahin

apna nafa dekh ke bhi ye sochta hun

is mein aur kisi ka to nuqsan nahin

lutf hua phir ghaarat kashti-rani ka

aaj bhi dariya mein koi tufan nahin

raunaq KHub hai peDon aur parindon ki

jangal be-shak jangal hai sunsan nahin

bila-ijazat jab chaho aa sakte ho

is darwaze par koi darban nahin