gurez humse kiya tha faqat ana ke liye

gurez ham se kiyā thā faqat anā ke liye

judā hue haiñ to tarsā kiye vafā ke liye

sahāb-e-lutf-o-ināyāt jis ghaḌī barsā

hamāre sar pe rahā sā.ebāñ sazā ke liye

badan darīda rahe be-niyāz-e-tār-o-rafū

ye ehtimām munāsib the bas qabā ke liye

jo haath sañg uThā.e hue hī uThte haiñ

duā karo vo uTheñ haath ab duā ke liye

ta.alluqāt ke yuuñ TūTne se dam na ghuTe

darīcha koī to rakho khulā havā ke liye

adāvatoñ ke panapne se kuchh nahīñ hāsil

mohabbatoñ ko jagah dil meñ do ḳhudā ke liye

gurez hum se kiya tha faqat ana ke liye

juda hue hain to tarsa kiye wafa ke liye

sahab-e-lutf-o-inayat jis ghaDi barsa

hamare sar pe raha saeban saza ke liye

badan darida rahe be-niyaz-e-tar-o-rafu

ye ehtimam munasib the bas qaba ke liye

jo hath sang uThae hue hi uThte hain

dua karo wo uThen hath ab dua ke liye

talluqat ke yun TuTne se dam na ghuTe

daricha koi to rakho khula hawa ke liye

adawaton ke panapne se kuchh nahin hasil

mohabbaton ko jagah dil mein do KHuda ke liye