ghurur-e-zat kahin naqd-e-jaan mein chhoD aae

ġhurūr-e-zāt kahīñ naqd-e-jāñ meñ chhoḌ aa.e

vo aag phir usī ātish-fishāñ meñ chhoḌ aa.e

azāb-e-hijr se tere visāl-lamhoñ tak

ham apnī zaat kahīñ darmiyāñ meñ chhoḌ aa.e

tamām umr phir us kī talāsh meñ bhaTke

vo ik sukūn jo kachche makāñ meñ chhoḌ aa.e

na raas aayā use merī zaat kā Thahrāv

to ḳhud ko is liye barq-e-tapāñ meñ chhoḌ aa.e

churā ke vaqt se apne azaab ke lamhe

ba-shakl-e-sañg yad-e-mehrbāñ meñ chhoḌ aa.e

huā na yuuñ kabhī ehsās-e-shiddat-e-hijrāñ

badan kī dhuup tire jism-o-jāñ meñ chhoḌ aa.e

tirī nigāh kare ab madār kī ta.a.īn

sitāra apnā tirī kahkashāñ meñ chhoḌ aa.e

guzartā hai kaf-e-saffāk se yā phir sar se

ma.āl-e-gul to yad-e-bāġhbāñ meñ chhoḌ aa.e

vahīñ thī darj hikāyāt-e-nā-sabūrī-e-dil

vo ek moḌ jo tum dāstāñ meñ chhoḌ aa.e

ghurur-e-zat kahin naqd-e-jaan mein chhoD aae

wo aag phir usi aatish-fishan mein chhoD aae

azab-e-hijr se tere visal-lamhon tak

hum apni zat kahin darmiyan mein chhoD aae

tamam umr phir us ki talash mein bhaTke

wo ek sukun jo kachche makan mein chhoD aae

na ras aaya use meri zat ka Thahraw

to KHud ko is liye barq-e-tapan mein chhoD aae

chura ke waqt se apne azab ke lamhe

ba-shakl-e-sang yad-e-mehrban mein chhoD aae

hua na yun kabhi ehsas-e-shiddat-e-hijran

badan ki dhup tere jism-o-jaan mein chhoD aae

teri nigah kare ab madar ki tain

sitara apna teri kahkashan mein chhoD aae

guzarta hai kaf-e-saffak se ya phir sar se

maal-e-gul to yad-e-baghban mein chhoD aae

wahin thi darj hikayat-e-na-saburi-e-dil

wo ek moD jo tum dastan mein chhoD aae