guzare hijr mein barson hi wasl-e-yar ke baad

guzāre hijr meñ barsoñ hī vasl-e-yār ke baad

uThāyā jabr bahut ham ne iḳhtiyār ke baad

na dushmanoñ ke liye thī zamīn-e-kūcha-e-dost

banī na phir koī turbat mire mazār ke baad

kis āsare pe guzārūñ zamāna-e-furqat

ki nā-umīd huā huuñ ik intizār ke baad

ḳhizāñ ke baad ilāhī bahār phir dekheñ

ḳhizāñ to dekh chuke mausam-e-bahār ke baad

mire shabāb kī yaad aa rahī hai piirī meñ

ki qadr nashsha kī hotī hai kuchh ḳhumār ke baad

milā jo qais sā ham-rang dasht-e-vahshat meñ

huā sukūn tabī.at ko intishār ke baad

vo mashq-e-tīr thī un kī hamāre hī dil tak

milā na phir koī naḳhchīr us shikār ke baad

pas-e-fanā hai tabāhī kī ibtidā mujh se

bahut sī āñdhiyāñ uTTheñgī is ġhubār ke baad

ham un ke bas meñ haiñ qaabū meñ the jo apnī 'diler'

ye bebasī na kisī ko ho iḳhtiyār ke baad

guzare hijr mein barson hi wasl-e-yar ke baad

uThaya jabr bahut hum ne iKHtiyar ke baad

na dushmanon ke liye thi zamin-e-kucha-e-dost

bani na phir koi turbat mere mazar ke baad

kis aasare pe guzarun zamana-e-furqat

ki na-umid hua hun ek intizar ke baad

KHizan ke baad ilahi bahaar phir dekhen

KHizan to dekh chuke mausam-e-bahaar ke baad

mere shabab ki yaad aa rahi hai piri mein

ki qadr nashsha ki hoti hai kuchh KHumar ke baad

mila jo qais sa ham-rang dasht-e-wahshat mein

hua sukun tabiat ko intishaar ke baad

wo mashq-e-tir thi un ki hamare hi dil tak

mila na phir koi naKHchir us shikar ke baad

pas-e-fana hai tabahi ki ibtida mujh se

bahut si aandhiyan uTThengi is ghubar ke baad

hum un ke bas mein hain qabu mein the jo apni 'diler'

ye bebasi na kisi ko ho iKHtiyar ke baad