guzare tumne kaise roz-o-shab humse KHafa ho kar

guzāre tum ne kaise roz-o-shab ham se ḳhafā ho kar

na ham ko raas aa.ī zindagī tum se judā ho kar

faqat ahl-e-junūñ vāqif haiñ is rāz-e-haqīqat se

hayāt-e-jāvidāñ miltī hai ulfat meñ fanā ho kar

kahāñ un ke diloñ meñ vo ḳhalish soz-e-mohabbat kī

tire tīr-e-nazar se jo rahe nā-āshnā ho kar

tumhārī bevafā.ī kā fasāna har zabāñ par hai

zamāne ko dikhā do intiqāman bā-vafā ho kar

fazā.eñ mahak uTThī haiñ tirī zulfoñ kī ḳhushbū se

tire kūche se jab bhī aa.ī hai bād-e-sabā ho kar

kisī kī bū-e-pairāhan gulistāñ se guzartī hai

shamīm-e-jāñ-fizā ban kar kabhī bād-e-sabā ho kar

'nadīm' is daur meñ har gaam par ta.an-o-malāmat haiñ

bahut dushvār hai duniyā meñ jiinā bā-vafā ho kar

guzare tum ne kaise roz-o-shab hum se KHafa ho kar

na hum ko ras aai zindagi tum se juda ho kar

faqat ahl-e-junun waqif hain is raaz-e-haqiqat se

hayat-e-jawidan milti hai ulfat mein fana ho kar

kahan un ke dilon mein wo KHalish soz-e-mohabbat ki

tere tir-e-nazar se jo rahe na-ashna ho kar

tumhaari bewafai ka fasana har zaban par hai

zamane ko dikha do intiqaman ba-wafa ho kar

fazaen mahak uTThi hain teri zulfon ki KHushbu se

tere kuche se jab bhi aai hai baad-e-saba ho kar

kisi ki bu-e-pairahan gulistan se guzarti hai

shamim-e-jaan-fiza ban kar kabhi baad-e-saba ho kar

'nadim' is daur mein har gam par tan-o-malamat hain

bahut dushwar hai duniya mein jina ba-wafa ho kar