guzar ja rah-o-manzil se guzar ja mauj-o-sahil se

guzar jā rāh-o-manzil se guzar jā mauj-o-sāhil se

mohabbat ho to ye āsāniyāñ miltī haiñ mushkil se

muqābil ho gayā nādān un ke husn-e-kāmil se

hameñ ab tang aa kar haath uThānā hī paḌā dil se

dil un kī raah meñ hai phir bhī ġham jaatā nahīñ dil se

mohabbat kā musāfir be-ḳhabar hai apnī manzil se

tum ahl-e-dil nahīñ ho phir vafā kā lutf kyā jaano

vafā kī intihā dil par vafā kī ibtidā dil se

abhī to shauq kī rāhoñ meñ kho jaanā bhī mumkin hai

ki ye rāheñ abhī mahfūz haiñ ilzām-e-manzil se

ḳhalish aur vo bhī ġham kī dard aur vo bhī mohabbat kā

shikāyat karne vaalā thā duā niklī mire dil se

agar chāheñ to pahlā hī qadam manzil pe jā pahuñche

pareshāñ ho ga.e arbāb-e-himmat qurb-e-manzil se

abhī tak zindagī meñ iztirāb-e-ishq baaqī hai

abhī tak zindagī kī mauj ko nisbat hai sāhil se

mujhe rāh-e-talab kī azmateñ uThne nahīñ detīñ

jo uThtā huuñ to phir aage nikal jaatā huuñ manzil se

mohabbat ke hazāroñ rāste tai kar ke aa.e haiñ

tamannāoñ kī manzil tak tamannāoñ kī manzil se

Thahar ai mauj-e-shor-āgīñ-o-shor-añgez-o-shor-afzā

abhī ik baat kahnī hai mujhe yārān-e-sāhil se

zahe ilzām-e-nazzāra ḳhushā anjām-e-nazzāra

nazar se be-ta.alluq dil nazar nā-āshnā dil se

mohabbat ne badal Daalā nizām-e-zindagī 'shāhid'

na āsānī se dil taskīn paatā hai na mushkil se

guzar ja rah-o-manzil se guzar ja mauj-o-sahil se

mohabbat ho to ye aasaniyan milti hain mushkil se

muqabil ho gaya nadan un ke husn-e-kaamil se

hamein ab tang aa kar hath uThana hi paDa dil se

dil un ki rah mein hai phir bhi gham jata nahin dil se

mohabbat ka musafir be-KHabar hai apni manzil se

tum ahl-e-dil nahin ho phir wafa ka lutf kya jaano

wafa ki intiha dil par wafa ki ibtida dil se

abhi to shauq ki rahon mein kho jaana bhi mumkin hai

ki ye rahen abhi mahfuz hain ilzam-e-manzil se

KHalish aur wo bhi gham ki dard aur wo bhi mohabbat ka

shikayat karne wala tha dua nikli mere dil se

agar chahen to pahla hi qadam manzil pe ja pahunche

pareshan ho gae arbab-e-himmat qurb-e-manzil se

abhi tak zindagi mein iztirab-e-ishq baqi hai

abhi tak zindagi ki mauj ko nisbat hai sahil se

mujhe rah-e-talab ki azmaten uThne nahin detin

jo uThta hun to phir aage nikal jata hun manzil se

mohabbat ke hazaron raste tai kar ke aae hain

tamannaon ki manzil tak tamannaon ki manzil se

Thahar ai mauj-e-shor-agin-o-shor-angez-o-shor-afza

abhi ek baat kahni hai mujhe yaran-e-sahil se

zahe ilzam-e-nazzara KHusha anjam-e-nazzara

nazar se be-talluq dil nazar na-ashna dil se

mohabbat ne badal Dala nizam-e-zindagi 'shahid'

na aasani se dil taskin pata hai na mushkil se