guzar nahin hai kisi ka to rasta kyon hai

guzar nahīñ hai kisī kā to rāsta kyoñ hai

jo rāsta hai to mahrūm-e-naqsh-e-pā kyoñ hai

har ek shaḳhs samajhtā hai ajnabī phir bhī

tumhāre ghar kā pata mujh se pūchhtā kyoñ hai

tumhārā shahr ujāloñ kā shahr sunte the

qadam qadam pe añdheroñ kā sāmnā kyoñ hai

vahī sahar hai vahī shab vahī hai hangāma

magar hayāt kā manzar udaas sā kyoñ hai

maiñ apne vaqt kī tasvīr ban gayā to nahīñ

har aadmī mujhe is tarah dekhtā kyoñ hai

nigāh jab tirī bīnā.ī kho chukī apnī

to zindagī tire hāthoñ meñ aa.ina kyoñ hai

kisī se mil ke bichhaḌ jaanā umr bhar ko 'nasīb'

zarā sī bhuul kī itnī baḌī sazā kyoñ hai

guzar nahin hai kisi ka to rasta kyon hai

jo rasta hai to mahrum-e-naqsh-e-pa kyon hai

har ek shaKHs samajhta hai ajnabi phir bhi

tumhaare ghar ka pata mujh se puchhta kyon hai

tumhaara shahr ujalon ka shahr sunte the

qadam qadam pe andheron ka samna kyon hai

wahi sahar hai wahi shab wahi hai hangama

magar hayat ka manzar udas sa kyon hai

main apne waqt ki taswir ban gaya to nahin

har aadmi mujhe is tarah dekhta kyon hai

nigah jab teri binai kho chuki apni

to zindagi tere hathon mein aaina kyon hai

kisi se mil ke bichhaD jaana umr bhar ko 'nasib'

zara si bhul ki itni baDi saza kyon hai