guzar raha hun siyah andhe faslon se main

guzar rahā huuñ siyah andhe fāsloñ se maiñ

na ab huuñ rah se ibārat na manziloñ se maiñ

kahāñ kahāñ se alag kar sakoge tum mujh ko

juḌā huā huuñ yahāñ laakh silsiloñ se maiñ

qadam milāne meñ sab kar rahe the quvvateñ sarf

milā huuñ raah meñ kitne hī qāfiloñ se maiñ

maiñ us ke paañv kī zanjīr dekhtā thā bahut

kuchh āshnā na thā apnī hī mushkiloñ se maiñ

ajiib log haiñ kuchh kah do maan lete haiñ

huā huuñ zer bahut zuud qātiloñ se maiñ

kaho to saath bahā le chalūñ ye dukh bhare shahr

guzar rahā huuñ ajab ḳhasta sāhiloñ se maiñ

maiñ kyuuñ burā.ī sunūñ dostoñ kī ai 'bānī'

alag nahīñ unhīñ khoTe khare diloñ se maiñ

guzar raha hun siyah andhe faslon se main

na ab hun rah se ibarat na manzilon se main

kahan kahan se alag kar sakoge tum mujh ko

juDa hua hun yahan lakh silsilon se main

qadam milane mein sab kar rahe the quwwaten sarf

mila hun rah mein kitne hi qafilon se main

main us ke panw ki zanjir dekhta tha bahut

kuchh aashna na tha apni hi mushkilon se main

ajib log hain kuchh kah do man lete hain

hua hun zer bahut zud qatilon se main

kaho to sath baha le chalun ye dukh bhare shahr

guzar raha hun ajab KHasta sahilon se main

main kyun burai sunun doston ki ai 'bani'

alag nahin unhin khoTe khare dilon se main