guzar rahi hai jo dil par zara kisi se kaho

guzar rahī hai jo dil par zarā kisī se kaho

kise hai taab sune tum bhalā kisī se kaho

ġham-e-jahāñ ho to kah kar kisī se halkā ho

na ho jahān kā ġham hī to kyā kisī se kaho

kabhī bhar aa.e yūñhī dil to kyā kare koī

chalo durust barā.e-ḳhudā kisī se kaho

shikast-e-ḳhvāb kā sadma kisī ne samjhā hai

rahā na ḳhvāb rahā bhī to kyā kisī se kaho

nafas nafas se lahū chūstī hai tanhā.ī

ye karb dard-o-alam ibtilā kisī se kaho

ye bojh dil pe liye phir rahe ho kab se miyāñ

chalo haTāo huā jo huā kisī se kaho

havā ke saath badalnā to kuchh nahīñ 'rizvāñ'

kabhī jo pherī ho tum ne havā kisī se kaho

guzar rahi hai jo dil par zara kisi se kaho

kise hai tab sune tum bhala kisi se kaho

gham-e-jahan ho to kah kar kisi se halka ho

na ho jahan ka gham hi to kya kisi se kaho

kabhi bhar aae yunhi dil to kya kare koi

chalo durust barae-KHuda kisi se kaho

shikast-e-KHwab ka sadma kisi ne samjha hai

raha na KHwab raha bhi to kya kisi se kaho

nafas nafas se lahu chusti hai tanhai

ye karb dard-o-alam ibtila kisi se kaho

ye bojh dil pe liye phir rahe ho kab se miyan

chalo haTao hua jo hua kisi se kaho

hawa ke sath badalna to kuchh nahin 'rizwan'

kabhi jo pheri ho tum ne hawa kisi se kaho