guzarne ko to shaariq apni har aalam mein guzri hai

guzarne ko to 'shāriq' apnī har aalam meñ guzrī hai

vahī hai zindagī lekin jo un ke ġham meñ guzrī hai

vo uftād-e-ḳhizāñ ho yā bahāroñ kī junūñ-ḳhezī

qayāmat hai pe sach pūchho to har mausam meñ guzrī hai

vo koī aur hoñge ḳhvāhish-e-amn-o-sukūñ vaale

yahāñ to umr saarī kāvish-e-paiham meñ guzrī hai

na pūchh ai ham-nashīñ kyā sānahe guzre mohabbat meñ

use kuchh dil samajhtā hai ki jis aalam meñ guzrī hai

mujhe jaise do-ālam mil ga.e jab mil ga.ī 'shāriq'

vo ik saa.at mohabbat kī jo us ke ġham meñ guzrī hai

guzarne ko to 'shaariq' apni har aalam mein guzri hai

wahi hai zindagi lekin jo un ke gham mein guzri hai

wo uftad-e-KHizan ho ya bahaaron ki junun-KHezi

qayamat hai pe sach puchho to har mausam mein guzri hai

wo koi aur honge KHwahish-e-amn-o-sukun wale

yahan to umr sari kawish-e-paiham mein guzri hai

na puchh ai ham-nashin kya sanahe guzre mohabbat mein

use kuchh dil samajhta hai ki jis aalam mein guzri hai

mujhe jaise do-alam mil gae jab mil gai 'shaariq'

wo ek saat mohabbat ki jo us ke gham mein guzri hai