guzashta shab mere hamrah tha mera main bhi

guzashta shab mire hamrāh thā mirā maiñ bhī

jabhī to maiñ ne tirī baat sun ke haañ kar dī

bujhā ke taaq pe rakh dī hai aql-e-mahz kī lau

yaqīñ kī varna mire dil meñ bhī kamī hotī

baras rahā thā zamīñ par lahū lahū taaza

nigah nigah meñ samāne lagī thī zarḳhezī

yahī vo naqsh hai jis par thā e.atibār hameñ

yahī vo rang hai jis meñ hamārī saañs ghulī

sunā ki chāñd na utregā dil ke āñgan meñ

shajar shajar pe hai raqsāñ ġhazab kī tārīkī

gudāz socheñ mahakne lagī thiiñ āḳhir-e-shab

ye kis ne merī nigāhoñ ko tāzgī baḳhshī

maiñ khiḌkiyoñ kī darāḌoñ se jhāñk letā huuñ

jo lamha lamha ubhartī hai chīḳh saḌkoñ kī

ragoñ meñ gūñjtī phirtī hai aaj tak 'sājid'

jo tere lams-e-mo.attar ne kī thī sargoshī

guzashta shab mere hamrah tha mera main bhi

jabhi to main ne teri baat sun ke han kar di

bujha ke taq pe rakh di hai aql-e-mahz ki lau

yaqin ki warna mere dil mein bhi kami hoti

baras raha tha zamin par lahu lahu taza

nigah nigah mein samane lagi thi zarKHezi

yahi wo naqsh hai jis par tha eatibar hamein

yahi wo rang hai jis mein hamari sans ghuli

suna ki chand na utrega dil ke aangan mein

shajar shajar pe hai raqsan ghazab ki tariki

gudaz sochen mahakne lagi thin aaKHir-e-shab

ye kis ne meri nigahon ko tazgi baKHshi

main khiDkiyon ki daraDon se jhank leta hun

jo lamha lamha ubharti hai chiKH saDkon ki

ragon mein gunjti phirti hai aaj tak 'sajid'

jo tere lams-e-moattar ne ki thi sargoshi