guzishta kuchh dinon se bekali hai

guzishta kuchh dinoñ se bekalī hai

kisī kī yaad ne hālat ye kī hai

jise sajde salāmī de rahe haiñ

tirā sajda husain ibn-e-'alī hai

rasūl-e-do-sarā farmā rahe haiñ

ḳhadīja sī na koī dūsrī hai

kahānī-kār se kaahe kā jhagḌā

koī kirdār bhī kab dā.imī hai

abhī sochā thā likhkhūñ chāñd is par

sar-e-qirtās phailī raushnī hai

tū 'ādil hai batā mere ḳhudāyā

guzārī ham ne jo vo zindagī hai

zamāne bhar ke ġham aur ik tirā ġham

isī ġham se hamārī har ḳhushī hai

agar aisā huā to aisā hogā

barā-e-jāñ 'azāb-e-āgahī hai

sunā hai fāteh-e-ālam thī lekin

mohabbat haath bāñdhe ab khaḌī hai

tire hote bahut āzād the ham

nahīñ tū paas to jaañ par banī hai

hue 'tasnīm' mushrik jis kī ḳhātir

use tauhīd kī hichkī lagī hai

guzishta kuchh dinon se bekali hai

kisi ki yaad ne haalat ye ki hai

jise sajde salami de rahe hain

tera sajda husain ibn-e-'ali hai

rasul-e-do-sara farma rahe hain

KHadija si na koi dusri hai

kahani-kar se kahe ka jhagDa

koi kirdar bhi kab daimi hai

abhi socha tha likhkhun chand is par

sar-e-qirtas phaili raushni hai

tu 'adil hai bata mere KHudaya

guzari hum ne jo wo zindagi hai

zamane bhar ke gham aur ek tera gham

isi gham se hamari har KHushi hai

agar aisa hua to aisa hoga

bara-e-jaan 'azab-e-agahi hai

suna hai fateh-e-alam thi lekin

mohabbat hath bandhe ab khaDi hai

tere hote bahut aazad the hum

nahin tu pas to jaan par bani hai

hue 'tasnim' mushrik jis ki KHatir

use tauhid ki hichki lagi hai