guzishta raat mujhe ruh tak rasai hui

guzishta raat mujhe ruuh tak rasā.ī huī

barāh-e-rāst kisī dil se āshnā.ī huī

batā rahā thā mujhe koī mere baare meñ

sunā rahā thā kahānī sunī-sunā.ī huī

baġhair samjhe uThāyā thā bār-e-kūza-garī

banā rahā thā maiñ shakleñ banī-banā.ī huī

maiñ pūchhtā huuñ koī hai jo vaqt rokegā

bhalā ye kaise rukegī zamīñ ghumā.ī huī

vo mere baa'd kisī aur kī mohabbat hai

luTā rahā hai vo daulat mirī kamā.ī huī

maiñ sochtā thā bhalā kaun mujh ko DhūñDegā

darūn-e-jism mirī ruuh tak khudā.ī huī

ye kis taraf se chalī hai havā-e-sard ye dhund

diloñ pe lipTī huī rāstoñ pe chhā.ī huī

maiñ is pe ḳhush bhī huā aur kuchh fasurda bhī

vo kar rahā hai mohabbat mirī sikhā.ī huī

maiñ jis ġhubār meñ āñkhoñ ko mal rahā thā 'uzair'

vo gard aur hī pairoñ kī thī uḌaa.ī huī

guzishta raat mujhe ruh tak rasai hui

barah-e-rast kisi dil se aashnai hui

bata raha tha mujhe koi mere bare mein

suna raha tha kahani suni-sunai hui

baghair samjhe uThaya tha bar-e-kuza-gari

bana raha tha main shaklen bani-banai hui

main puchhta hun koi hai jo waqt rokega

bhala ye kaise rukegi zamin ghumai hui

wo mere ba'd kisi aur ki mohabbat hai

luTa raha hai wo daulat meri kamai hui

main sochta tha bhala kaun mujh ko DhunDega

darun-e-jism meri ruh tak khudai hui

ye kis taraf se chali hai hawa-e-sard ye dhund

dilon pe lipTi hui raston pe chhai hui

main is pe KHush bhi hua aur kuchh fasurda bhi

wo kar raha hai mohabbat meri sikhai hui

main jis ghubar mein aankhon ko mal raha tha 'uzair'

wo gard aur hi pairon ki thi uDai hui