guzishta waqt ki har baat aani jaani hui

guzishta vaqt kī har baat aanī jaanī huī

ye baat agle safar kī na.ī nishānī huī

lagā ke baiTh ga.e shart dast-o-bāzū kī

agarche dil meñ hai pahle se haar maanī huī

judā kiyā hai use aap hī to chup kyoñ ho

bhalā ye kaun se jazbe kī tarjumānī huī

use phir aur kisī sher meñ kahā na gayā

jo baat aap se pichhle dinoñ zabānī huī

sunā.e jaa.eñ agar koī sunñe vaalā ho

kisī kī yaad hamāre liye kahānī huī

badal gayā hai chalan shahr-e-ārzū kā 'nasīm'

is ahd-e-nau meñ tumhārī vafā purānī huī

guzishta waqt ki har baat aani jaani hui

ye baat agle safar ki nai nishani hui

laga ke baiTh gae shart dast-o-bazu ki

agarche dil mein hai pahle se haar mani hui

juda kiya hai use aap hi to chup kyon ho

bhala ye kaun se jazbe ki tarjumani hui

use phir aur kisi sher mein kaha na gaya

jo baat aap se pichhle dinon zabani hui

sunae jaen agar koi sunne wala ho

kisi ki yaad hamare liye kahani hui

badal gaya hai chalan shahr-e-arzu ka 'nasim'

is ahd-e-nau mein tumhaari wafa purani hui