hadisa ban ke har ek roz guzar jata hun

hādisa ban ke har ik roz guzar jaatā huuñ

ek vīrāne kī bāñhoñ meñ Thahar jaatā huuñ

sub.h ko jab bhī jagātī hai koī māyūsī

shab kī āñkhoñ meñ kisī ḳhvāb sā bhar jaatā huuñ

aur jab dhuup jalātī hai safar meñ mujh ko

maiñ pighal kar kisī saa.e meñ pasar jaatā huuñ

gher letī hai mujhe dekh ke mauqa aksar

dil meñ tanhā.ī kī is bhiiḌ se Dar jaatā huuñ

ye hī ma.amūl hai har din kā har ik lamhe kā

tujh ko jiite hue ai zindagī mar jaatā huuñ

koshisheñ kitnī hī kartā huuñ sameTūñ ḳhud ko

jaane kyā hotā hai har baar bikhar jaatā huuñ

bhuul jaatā huuñ kahīñ rakh ke maiñ ḳhud ko aur phir

sochtā rahtā huuñ āḳhir maiñ kidhar jaatā huuñ

silsila saath mire aisā hai tūfānoñ kā

ik se bachtā huuñ to duuje meñ utar jaatā huuñ

hadisa ban ke har ek roz guzar jata hun

ek virane ki banhon mein Thahar jata hun

subh ko jab bhi jagati hai koi mayusi

shab ki aankhon mein kisi KHwab sa bhar jata hun

aur jab dhup jalati hai safar mein mujh ko

main pighal kar kisi sae mein pasar jata hun

gher leti hai mujhe dekh ke mauqa aksar

dil mein tanhai ki is bhiD se Dar jata hun

ye hi mamul hai har din ka har ek lamhe ka

tujh ko jite hue ai zindagi mar jata hun

koshishen kitni hi karta hun sameTun KHud ko

jaane kya hota hai har bar bikhar jata hun

bhul jata hun kahin rakh ke main KHud ko aur phir

sochta rahta hun aaKHir main kidhar jata hun

silsila sath mere aisa hai tufanon ka

ek se bachta hun to duje mein utar jata hun