hadisa kya hua KHuda jaane

hādisa kyā huā ḳhudā jaane

jam.a haiñ gird apne begāne

ek dil aur saiñkaḌoñ nāseh

kaise har ek kā kahā maane

aate jaate haiñ kis liye ye log

aaj kyā ho gayā ḳhudā jaane

har ghaḌī sabr-o-zabt kī talqīn

khul ke rone diyā na duniyā ne

zaḳhm siine pe ashk āñkhoñ meñ

bas yahī kuchh diyā hai duniyā ne

pyaas bujhtī thī jis se rindoñ kī

dekh ḳhālī haiñ ab vo paimāne

dil meñ raushan haiñ yaad kī sham.eñ

jal-bujhe aarzū ke parvāne

baḌh ga.ī aur dil kī betābi

kaun aaya hai aaj samjhāne

dil ko kyā kyā diye fareb ke dars

zindagī bhar tirī tamanna ne

rah na jaanā ulajh ke ai nādāñ

zulf-e-gītī chalā hai suljhāne

shahr meñ tere ishq ke ai 'rāz'

jitne muñh aaj utne afsāne

hadisa kya hua KHuda jaane

jama hain gird apne begane

ek dil aur sainkaDon naseh

kaise har ek ka kaha mane

aate jate hain kis liye ye log

aaj kya ho gaya KHuda jaane

har ghaDi sabr-o-zabt ki talqin

khul ke rone diya na duniya ne

zaKHm sine pe ashk aankhon mein

bas yahi kuchh diya hai duniya ne

pyas bujhti thi jis se rindon ki

dekh KHali hain ab wo paimane

dil mein raushan hain yaad ki shamen

jal-bujhe aarzu ke parwane

baDh gai aur dil ki betabi

kaun aaya hai aaj samjhane

dil ko kya kya diye fareb ke dars

zindagi bhar teri tamanna ne

rah na jaana ulajh ke ai nadan

zulf-e-giti chala hai suljhane

shahr mein tere ishq ke ai 'raaz'

jitne munh aaj utne afsane