hadse zist ke is dil mein jo ghar karte hain

hādse ziist ke is dil meñ jo ghar karte haiñ

dasht-e-āġhosh meñ vo 'umr basar karte haiñ

mere hisse meñ mohabbat nahīñ likkhī lekin

merī āñkhoñ meñ ka.ī ḳhvāb safar karte haiñ

is liye ḳhud ko miTānā bhī zarūrī samjhā

ġham zamāne ke mire dil pe asar karte haiñ

ab to bantā hī nahīñ terā parāyoñ se gila

haal behāl yahāñ apne agar karte haiñ

is liye toḌ ke baiThī huuñ ta'alluq dil se

ab kahāñ log mohabbat kī qadar karte haiñ

maan jaatī huuñ maiñ har baat min-o-‘an us kī

is qadar fahm-o-farāsat se ḳhabar karte haiñ

tū ne dekhā hī nahīñ dil meñ ḳhazānoñ ko 'umūd'

in meñ kuchh saañp haiñ jo sab pe nazar karte haiñ

hadse zist ke is dil mein jo ghar karte hain

dasht-e-aghosh mein wo 'umr basar karte hain

mere hisse mein mohabbat nahin likkhi lekin

meri aankhon mein kai KHwab safar karte hain

is liye KHud ko miTana bhi zaruri samjha

gham zamane ke mere dil pe asar karte hain

ab to banta hi nahin tera parayon se gila

haal behaal yahan apne agar karte hain

is liye toD ke baiThi hun ta'alluq dil se

ab kahan log mohabbat ki qadar karte hain

man jati hun main har baat min-o-‘an us ki

is qadar fahm-o-farasat se KHabar karte hain

tu ne dekha hi nahin dil mein KHazanon ko 'umud'

in mein kuchh sanp hain jo sab pe nazar karte hain