hae kaisi wo sham hoti hai

haa.e kaisī vo shaam hotī hai

dāstāñ jab tamām hotī hai

ye to bāteñ haiñ sirf zāhid kī

kahīñ mai bhī harām hotī hai

shām-e-furqat kī uljhaneñ tauba

kis ġhazab kī ye shaam hotī hai

ishq meñ aur qarār kyā ma.anī

zindagī tak harām hotī hai

ho ke aatī hai jab udhar se sabā

kitnī nāzuk-ḳhirām hotī hai

ye tasadduq hai un kī zulfoñ kā

merī har sub.h shaam hotī hai

jab bhī hotī haiñ jannateñ taqsīm

huur zāhid ke naam hotī hai

lamhe aate haiñ vo bhī ulfat meñ

jab ḳhamoshī kalām hotī hai

piine vaalā ho gar to saaqī kī

har nazar daur-e-jām hotī hai

har adā ham adā-shanāsoñ kī

zindagī kā payām hotī hai

vaqt Thahrā huā sā hai 'naushād'

na sahar aur na shaam hotī hai

hae kaisi wo sham hoti hai

dastan jab tamam hoti hai

ye to baaten hain sirf zahid ki

kahin mai bhi haram hoti hai

sham-e-furqat ki uljhanen tauba

kis ghazab ki ye sham hoti hai

ishq mein aur qarar kya mani

zindagi tak haram hoti hai

ho ke aati hai jab udhar se saba

kitni nazuk-KHiram hoti hai

ye tasadduq hai un ki zulfon ka

meri har subh sham hoti hai

jab bhi hoti hain jannaten taqsim

hur zahid ke nam hoti hai

lamhe aate hain wo bhi ulfat mein

jab KHamoshi kalam hoti hai

pine wala ho gar to saqi ki

har nazar daur-e-jam hoti hai

har ada hum ada-shanason ki

zindagi ka payam hoti hai

waqt Thahra hua sa hai 'naushad'

na sahar aur na sham hoti hai