hae kya haal kar liya dil ka

haa.e kyā haal kar liyā dil kā

zaḳhm ab tak nahīñ siyā dil kā

aa ke sūrat dikhā in āñkhoñ ko

bujh na jaa.e kahīñ diyā dil kā

kal talak thā vafā kā saudā.ī

aaj paḌhtā hai marsiya dil kā

tole ehsās kī kasauTī par

hai judāgāna zāviya dil kā

koī rough-work kā nishāñ bhī nahīñ

ḳhālī ḳhālī hai hāshiya dil kā

kāmyābī kā inhisār us par

ham ko karnā hai tasfiya dil kā

pyaas lagtī nahīñ kabhī us ko

ḳhuun jis ne bhī pī liyā dil kā

nasr meñ guftugū kareñ kyūñkar

jab hai andāz nazmiya dil kā

jab nahīñ sūjhtā mujhe kuchh aur

bāñdh letā huuñ qāfiya dil kā

'shād' ham ne to de diyā thā use

kyā pata us ne kyā kiyā dil kā

hae kya haal kar liya dil ka

zaKHm ab tak nahin siya dil ka

aa ke surat dikha in aankhon ko

bujh na jae kahin diya dil ka

kal talak tha wafa ka saudai

aaj paDhta hai marsiya dil ka

tole ehsas ki kasauTi par

hai judagana zawiya dil ka

koi rough-work ka nishan bhi nahin

KHali KHali hai hashiya dil ka

kaamyabi ka inhisar us par

hum ko karna hai tasfiya dil ka

pyas lagti nahin kabhi us ko

KHun jis ne bhi pi liya dil ka

nasr mein guftugu karen kyunkar

jab hai andaz nazmiya dil ka

jab nahin sujhta mujhe kuchh aur

bandh leta hun qafiya dil ka

'shad' hum ne to de diya tha use

kya pata us ne kya kiya dil ka