hae urdu ye siyasat teri jagir ke sath

haa.e urdu ye siyāsat tirī jāgīr ke saath

koī 'ġhālib' kā taraf-dār koī 'mīr' ke saath

zindagī ek safar ḳhauf kī zanjīr ke saath

maut ik ḳhvāb-e-girāñ hashr kī ta.abīr ke saath

har adā husn kī mahfūz hai tāsīr ke saath

boltī chaltī thiraktī huī tasvīr ke saath

zabt kī had se guzar kar bhī duā kartā huuñ

shikva-bar-lab huuñ magar jazba-e-tāmīr ke saath

jānī-pahchānī huī shakl bhī mub.ham sī lage

zindagī kā ye fusūñ apnī hī tasvīr ke saath

ab to Thokar bhī lage to nahīñ uThtī jhankār

pahle āvāz thī har jumbish-e-zanjīr ke saath

dīda-e-said se āgāh na dil se vāqif

ajnabī kaun hai tarkash meñ tire tiir ke saath

apnī qismat ke jo mālik haiñ ye un se pūchho

rabt tadbīr ko hotā hai jo taqdīr ke saath

faiz-e-mausam hī sahī sehr-e-taġhayyur hī sahī

barq girtī hai magar aah kī tāsīr ke saath

apnī tasvīr se ik ishq sā hotā hai 'matīn'

ye junūñ aur fuzūñ hotā tash.hīr ke saath

hae urdu ye siyasat teri jagir ke sath

koi 'ghaalib' ka taraf-dar koi 'mir' ke sath

zindagi ek safar KHauf ki zanjir ke sath

maut ek KHwab-e-giran hashr ki tabir ke sath

har ada husn ki mahfuz hai tasir ke sath

bolti chalti thirakti hui taswir ke sath

zabt ki had se guzar kar bhi dua karta hun

shikwa-bar-lab hun magar jazba-e-tamir ke sath

jaani-pahchani hui shakl bhi mubham si lage

zindagi ka ye fusun apni hi taswir ke sath

ab to Thokar bhi lage to nahin uThti jhankar

pahle aawaz thi har jumbish-e-zanjir ke sath

dida-e-said se aagah na dil se waqif

ajnabi kaun hai tarkash mein tere tir ke sath

apni qismat ke jo malik hain ye un se puchho

rabt tadbir ko hota hai jo taqdir ke sath

faiz-e-mausam hi sahi sehr-e-taghayyur hi sahi

barq girti hai magar aah ki tasir ke sath

apni taswir se ek ishq sa hota hai 'matin'

ye junun aur fuzun hota tashhir ke sath