hail dilon ki rah mein kuchh to ana bhi hai

haa.il diloñ kī raah meñ kuchh to anā bhī hai

ġhāfil samajh rahā hai vahī bā-vafā bhī hai

aadat burī hai ġham meñ sahāroñ kī dosto

tanhā sulagte rahne kā apnā maza bhī hai

ham ne baḌe hī pyaar se rishte sajā.e the

ab tum kaho ki rishtoñ meñ kyā kuchh bachā bhī hai

ik rabt-e-mustaqil hai isī rahguzar ke saath

jis rahguzar pe qāfla-e-dil luTā bhī hai

ham rahravān-e-shahr-e-tamannā ko kyā pata

manzil rah-e-talab se kahāñ tak judā bhī hai

hai aa.ine meñ aks mirā zāhirī magar

bātin meñ jhāñkiye ki vo mujh se judā bhī hai

mazlūm-e-husn huuñ so na tanhā samajh mujhe

jis kā nahīñ hai koī to us kā ḳhudā bhī hai

be-ḳhauf bāñTte raho zulmat meñ nuur tum

apnī tapish se kyā koī jugnū jalā bhī hai

paḌhiye mujhe salīqe se phir sochiye janāb

kyā dard-e-mustaqil hai maraz lā-davā bhī hai

'zākir' ye tāj-o-taḳht hai mansūb un ke naam

jin ke saroñ pe sāya-e-bāl-e-humā bhī hai

hail dilon ki rah mein kuchh to ana bhi hai

ghafil samajh raha hai wahi ba-wafa bhi hai

aadat buri hai gham mein sahaaron ki dosto

tanha sulagte rahne ka apna maza bhi hai

hum ne baDe hi pyar se rishte sajae the

ab tum kaho ki rishton mein kya kuchh bacha bhi hai

ek rabt-e-mustaqil hai isi rahguzar ke sath

jis rahguzar pe qafla-e-dil luTa bhi hai

hum rahrawan-e-shahr-e-tamanna ko kya pata

manzil rah-e-talab se kahan tak juda bhi hai

hai aaine mein aks mera zahiri magar

baatin mein jhankiye ki wo mujh se juda bhi hai

mazlum-e-husn hun so na tanha samajh mujhe

jis ka nahin hai koi to us ka KHuda bhi hai

be-KHauf banTte raho zulmat mein nur tum

apni tapish se kya koi jugnu jala bhi hai

paDhiye mujhe saliqe se phir sochiye janab

kya dard-e-mustaqil hai maraz la-dawa bhi hai

'zakir' ye taj-o-taKHt hai mansub un ke nam

jin ke saron pe saya-e-baal-e-huma bhi hai