hakim-e-waqt ki beTi se mohabbat kar ke

hākim-e-vaqt kī beTī se mohabbat kar ke

kyā milā tujh ko qabīle se baġhāvat kar ke

rāt-bhar āhaTeñ to ḳhvāb-darīchoñ pe rahīñ

dekh phir bhaag ga.e ḳhvāb sharārat kar ke

tū na aa.egā to ik paikar-e-nāyāb tirā

merī āñkhoñ meñ utar aa.egā hijrat kar ke

phuul ab zaḳhm kī tasvīr nazar aatī hai

mere jazboñ kī ridāoñ se shikāyat kar ke

maiñ ne har rang meñ jiine kā hunar sīkhā hai

jiinā chāho to jiyo mujh ko malāmat kar ke

aur haiñ kitnī lakīreñ maiñ safar kī dekhūñ

kitne anjān se rastoñ kī masāfat kar ke

aaj phir sar ko jhukā.e hue ghar par 'ābid'

thak gayā ḳhud ko ġhubār-e-rah-e-vahshat kar ke

hakim-e-waqt ki beTi se mohabbat kar ke

kya mila tujh ko qabile se baghawat kar ke

raat-bhar aahaTen to KHwab-darichon pe rahin

dekh phir bhag gae KHwab shararat kar ke

tu na aaega to ek paikar-e-nayab tera

meri aankhon mein utar aaega hijrat kar ke

phul ab zaKHm ki taswir nazar aati hai

mere jazbon ki ridaon se shikayat kar ke

main ne har rang mein jine ka hunar sikha hai

jina chaho to jiyo mujh ko malamat kar ke

aur hain kitni lakiren main safar ki dekhun

kitne anjaan se raston ki masafat kar ke

aaj phir sar ko jhukae hue ghar par 'abid'

thak gaya KHud ko ghubar-e-rah-e-wahshat kar ke