haal-e-anjam se piri mein KHabar-dar hue

hāl-e-anjām se piirī meñ ḳhabar-dār hue

haif-sad-haif ki ab ḳhvāb se bedār hue

kis tarah ḳhāna-nashīnī se na ghabrā jaa.eñ

aadmī ham na hue nuqta-e-parkār hue

ḳhāna-e-chashm meñ rakkhā na basārat ne qadam

band jis din se tire rauzan-e-dīvār hue

hai mire pesh-e-nazar ab bhī tumhārā bachpan

mujh se batlāo ki tum kab se tarahdār hue

nafā kyā pahoñche kisī ko jo tavangar ho baḳhīl

kyā anādil ko milā phuul jo zardār hue

past himmat huī muusā kī haqīqat sun kar

bhuul kar ham na kabhī tālib-e-dīdār hue

mauqa-e-dīd jab aaya to nigah ḳhīra huī

mardum-e-dīda ajab vaqt meñ bīmār hue

shīsha se ban ke parī bint-e-inab jab niklī

dekh kar jaame se bāhar vahīñ mai-ḳhvār hue

vasl meñ talḳhī-e-furqat kī talāfī ye huī

lab-e-shīrīn-e-sanam mujh se shakar-bār hue

muntashir fikr-e-ma.īshat se hue hosh-o-havās

tā.ir-e-aql-e-rasā par tire bekār hue

hashr meñ aish ke sāmāñ hue dushman 'tālib'

yār-e-ġhār apne jo duniyā meñ the aġhyār hue

haal-e-anjam se piri mein KHabar-dar hue

haif-sad-haif ki ab KHwab se bedar hue

kis tarah KHana-nashini se na ghabra jaen

aadmi hum na hue nuqta-e-parkar hue

KHana-e-chashm mein rakkha na basarat ne qadam

band jis din se tere rauzan-e-diwar hue

hai mere pesh-e-nazar ab bhi tumhaara bachpan

mujh se batlao ki tum kab se tarahdar hue

nafa kya pahonche kisi ko jo tawangar ho baKHil

kya anadil ko mila phul jo zardar hue

past himmat hui musa ki haqiqat sun kar

bhul kar hum na kabhi talib-e-didar hue

mauqa-e-did jab aaya to nigah KHira hui

mardum-e-dida ajab waqt mein bimar hue

shisha se ban ke pari bint-e-inab jab nikli

dekh kar jame se bahar wahin mai-KHwar hue

wasl mein talKHi-e-furqat ki talafi ye hui

lab-e-shirin-e-sanam mujh se shakar-bar hue

muntashir fikr-e-maishat se hue hosh-o-hawas

tair-e-aql-e-rasa par tere bekar hue

hashr mein aish ke saman hue dushman 'talib'

yar-e-ghaar apne jo duniya mein the aghyar hue