haal-e-bedari mein rah kar bhi main KHwabon mein raha

hāl-e-bedārī meñ rah kar bhī maiñ ḳhvāboñ meñ rahā

jaise pyāsā koī ik umr sarāboñ meñ rahā

mirī ḳhushbū se mo.attar thā gulistān-e-vafā

ḳhaar mānind mirā yaar gulāboñ meñ rahā

guftugū tak rahī mahdūd mulāqāt apnī

mirā mahbūb shab-e-vasl hijāboñ meñ rahā

ab mujhe ḳhāk-nashīnī kā sharaf hāsil hai

ye alag baat hai kal tak maiñ navāboñ meñ rahā

pyaar hī pyaar thā tahrīr mire ḳhat meñ magar

juz shikāyat nahīñ kuchh us ke javāboñ meñ rahā

maiñ ne har haal meñ parvāz kā sīkhā hai hunar

kaT ga.e par mire phir bhī maiñ uqāboñ meñ rahā

ishq sābit huā nuqsān kā saudā 'ārif'

sirf ghāTā hī mohabbat ke hisāboñ meñ rahā

haal-e-bedari mein rah kar bhi main KHwabon mein raha

jaise pyasa koi ek umr sarabon mein raha

meri KHushbu se moattar tha gulistan-e-wafa

KHar manind mera yar gulabon mein raha

guftugu tak rahi mahdud mulaqat apni

mera mahbub shab-e-wasl hijabon mein raha

ab mujhe KHak-nashini ka sharaf hasil hai

ye alag baat hai kal tak main nawabon mein raha

pyar hi pyar tha tahrir mere KHat mein magar

juz shikayat nahin kuchh us ke jawabon mein raha

main ne har haal mein parwaz ka sikha hai hunar

kaT gae par mere phir bhi main uqabon mein raha

ishq sabit hua nuqsan ka sauda 'arif'

sirf ghaTa hi mohabbat ke hisabon mein raha