haal-e-dil bad se bad-tar hua dekhiye

hāl-e-dil bad se bad-tar huā dekhiye

aap kā kaam hai dekhnā dekhiye

vo jo rakkhā huā hai jahāñ ke liye

aap ḳhud bhī to vo aa.ina dekhiye

'aql vāloñ kī imdād ke vāste

jāñ-ba-kaf hai koī sar-phirā dekhiye

shahr jal bujh gayā log mar kab ga.e

sub.h-e-nau kal nayā hādisa dekhiye

is tamāsha-e-ahl-e-siyāsat ko aap

dekh sakte haiñ bas bārhā dekhiye

apne ausān khotī zamīñ hī nahīñ

āsmāñ ko bhī martā huā dekhiye

ek hālat hai dil kī kuchh aisī bhī jab

ḳhud ko mumkin hai ḳhud se judā dekhiye

jalva-farmā hai jo apne andar use

dam-ba-dam dekhiye jā-ba-jā dekhiye

ek duuje se uktā ga.e aadmī

in se uktā.egā kab ḳhudā dekhiye

shiddat-e-ġham hai maiñ bhī huuñ pyāsā 'amar'

aas paas ab koī mai-kada dekhiye

haal-e-dil bad se bad-tar hua dekhiye

aap ka kaam hai dekhna dekhiye

wo jo rakkha hua hai jahan ke liye

aap KHud bhi to wo aaina dekhiye

'aql walon ki imdad ke waste

jaan-ba-kaf hai koi sar-phira dekhiye

shahr jal bujh gaya log mar kab gae

subh-e-nau kal naya hadisa dekhiye

is tamasha-e-ahl-e-siyasat ko aap

dekh sakte hain bas barha dekhiye

apne ausan khoti zamin hi nahin

aasman ko bhi marta hua dekhiye

ek haalat hai dil ki kuchh aisi bhi jab

KHud ko mumkin hai KHud se juda dekhiye

jalwa-farma hai jo apne andar use

dam-ba-dam dekhiye ja-ba-ja dekhiye

ek duje se ukta gae aadmi

in se uktaega kab KHuda dekhiye

shiddat-e-gham hai main bhi hun pyasa 'amar'

aas pas ab koi mai-kada dekhiye