haal-e-dil humne sunaya to bura man gae

hāl-e-dil ham ne sunāyā to burā maan ga.e

ashk āñkhoñ meñ jo aaya to burā maan ga.e

va.ada karke jo na aa.e to koī baat nahīñ

bevafā kah ke bulāyā to burā maan ga.e

jis ke har lafz meñ har band meñ naam un kā thā

ham ne vo giit sunāyā to burā maan ga.e

vo jo ġhairoñ se ham-āġhosh huā karte haiñ

un ko pahlū meñ biThāyā to burā maan ga.e

aap ne jashn charāġhoñ kā manāyā lekin

ik diyā ham ne jalāyā to burā maan ga.e

jaam pe jaam uThāte rahe piine vaale

ham ne jo haath baḌhāyā to burā maan ga.e

naaz pe naaz uThāyā to baḌe achchhe the

niiñd se un ko jagāyā to burā maan ga.e

aib har shaḳhs meñ jo DhūñD rahe the 'anjum'

aa.ina un ko dikhāyā to burā maan ga.e

haal-e-dil hum ne sunaya to bura man gae

ashk aankhon mein jo aaya to bura man gae

wada karke jo na aae to koi baat nahin

bewafa kah ke bulaya to bura man gae

jis ke har lafz mein har band mein nam un ka tha

hum ne wo git sunaya to bura man gae

wo jo ghairon se ham-aghosh hua karte hain

un ko pahlu mein biThaya to bura man gae

aap ne jashn charaghon ka manaya lekin

ek diya hum ne jalaya to bura man gae

jam pe jam uThate rahe pine wale

hum ne jo hath baDhaya to bura man gae

naz pe naz uThaya to baDe achchhe the

nind se un ko jagaya to bura man gae

aib har shaKHs mein jo DhunD rahe the 'anjum'

aaina un ko dikhaya to bura man gae