haal-e-dil tum se meri jaan na kaha kaun se din

hāl-e-dil tum se mirī jaañ na kahā kaun se din

mere kahne ko bhalā tum ne sunā kaun se din

lazzateñ vasl kī kuchh maiñ ne bayāñ kiiñ to kahā

aap ke vāste din aisā huā kaun se din

jab kahā maiñ ne vo kyā din the jo milte the tum

ho ke anjān ajab Dhab se kahā kaun se din

vasl kī shab hai milo aaj to dil khol ke ḳhuub

ai mirī jaan ye jā.egī hayā kaun se din

rashk-āmez jo kuchh maiñ ne kahā to bole

ġhair ke saath mujhe dekh liyā kaun se din

har ghaḌī dil meñ rahā ḳhauf bigaḌ jaane kā

tere milne meñ mazā ham ko milā kaun se din

kaun sā din hai jo bechain nahīñ ho ke 'nizām'

be-qarārī se na us dar pe gayā kaun se din

haal-e-dil tum se meri jaan na kaha kaun se din

mere kahne ko bhala tum ne suna kaun se din

lazzaten wasl ki kuchh main ne bayan kin to kaha

aap ke waste din aisa hua kaun se din

jab kaha main ne wo kya din the jo milte the tum

ho ke anjaan ajab Dhab se kaha kaun se din

wasl ki shab hai milo aaj to dil khol ke KHub

ai meri jaan ye jaegi haya kaun se din

rashk-amez jo kuchh main ne kaha to bole

ghair ke sath mujhe dekh liya kaun se din

har ghaDi dil mein raha KHauf bigaD jaane ka

tere milne mein maza hum ko mila kaun se din

kaun sa din hai jo bechain nahin ho ke 'nizam'

be-qarari se na us dar pe gaya kaun se din