haal-e-poshida khula saman-e-ibrat dekh kar

hāl-e-poshīda khulā sāmān-e-ibrat dekh kar

paḌh liyā qismat kā likkhā lauh-e-turbat dekh kar

is qadar be-ḳhud huā āsār-e-vahshat dekh kar

ā.īna se naam pūchhā apnī sūrat dekh kar

dekhiye mahshar meñ bhī sūrat dikhā.e yā nahīñ

subah bhāgī hai shab-e-hijrāñ kī zulmat dekh kar

jām-e-kausar dast-e-sāqī meñ nazar aayā mujhe

uTh gayā āñkhoñ kā parda abr-e-rahmat dekh kar

raat din ke maḳhmase se ai junūñ paa.ī najāt

ablaq-e-ayyām bhāgā merī vahshat dekh kar

tere kūche meñ tirā jalva nazar aayā mujhe

sāne-e-jannat ko dekhā bāġh-e-jannat dekh kar

muñh hamārā jalva-e-dīdār ke laa.eq kahāñ

apnī sūrat dekhte haiñ terī sūrat dekh kar

chaar dīvār-e-anāsir par safedī phir ga.ī

āñkheñ raushan ho ga.iiñ terī sabāhat dekh kar

vahshat-e-dil hashr ke din bhī rahe kā.vus talab

kāñTe DhūñDhe ham ne sahrā-e-qayāmat dekh kar

chahchahe bulbul ke āvāz-e-kaf-e-afsos hoñ

rañg-e-gul uḌ jaa.e merā dāġh-e-hasrat dekh kar

abr udhar aayā idhar mai-ḳhvāroñ kā beḌā hai paar

kashtī-e-mai mol ke dariyā-e-rahmat dekh kar

aañsū poñchhe yaad aayā jab javānī kā mazā

āñkheñ malte rah ga.e ham ḳhvāb-e-rāhat dekh kar

barahman ka.aba meñ aayā shaiḳh pahūñchā dair meñ

log be-vahdat ho.e haiñ terī kasrat dekh kar

har ghaḌī aatī hai kānoñ meñ ye āvāz-e-jaras

kaun duniyā se safar kartā hai saa.at dekh kar

nashsha ke asbāb-e-taz.īñ meñ bhī nashsha hai zarūr

merī āñkheñ chaḌh ga.iiñ mai-ḳhāne kī chhat dekh kar

ab nahīñ nāzuk-mizājī se tavajjoh kā dimāġh

ai ajal aanā kabhī hañgām-e-fursat dekh kar

vo muvahhid huuñ na rakkhā dūsre se ittihād

ruuh ne chhoḌā badan ko zidd-e-vahdat dekh kar

ḳhūn-e-bulbul se magar sīñchā hai bāġh-e-dahr ko

ham lahū barsāte haiñ phūloñ kī rañgat dekh kar

tere bande sar jhukāte haiñ butoñ ke sāmne

sajde kartā huuñ ilāhī terī qudarat dekh kar

zaḳhmī-e-teġh-e-taġhāful par nazar jamtī nahīñ

chashm-e-sozan band hotī hai jarāhat dekh kar

jī lagā kar ye ġhazal kis tarah kahiye ai 'munīr'

bujh gayā dil kūch-e-manzil kī azīmat dekh kar

haal-e-poshida khula saman-e-ibrat dekh kar

paDh liya qismat ka likkha lauh-e-turbat dekh kar

is qadar be-KHud hua aasar-e-wahshat dekh kar

aaina se nam puchha apni surat dekh kar

dekhiye mahshar mein bhi surat dikhae ya nahin

subah bhagi hai shab-e-hijran ki zulmat dekh kar

jam-e-kausar dast-e-saqi mein nazar aaya mujhe

uTh gaya aankhon ka parda abr-e-rahmat dekh kar

raat din ke maKHmase se ai junun pai najat

ablaq-e-ayyam bhaga meri wahshat dekh kar

tere kuche mein tera jalwa nazar aaya mujhe

sane-e-jannat ko dekha bagh-e-jannat dekh kar

munh hamara jalwa-e-didar ke laeq kahan

apni surat dekhte hain teri surat dekh kar

chaar diwar-e-anasir par safedi phir gai

aankhen raushan ho gain teri sabahat dekh kar

wahshat-e-dil hashr ke din bhi rahe kawus talab

kanTe DhunDhe hum ne sahra-e-qayamat dekh kar

chahchahe bulbul ke aawaz-e-kaf-e-afsos hon

rang-e-gul uD jae mera dagh-e-hasrat dekh kar

abr udhar aaya idhar mai-KHwaron ka beDa hai par

kashti-e-mai mol ke dariya-e-rahmat dekh kar

aansu ponchhe yaad aaya jab jawani ka maza

aankhen malte rah gae hum KHwab-e-rahat dekh kar

barahman kaba mein aaya shaiKH pahuncha dair mein

log be-wahdat hoe hain teri kasrat dekh kar

har ghaDi aati hai kanon mein ye aawaz-e-jaras

kaun duniya se safar karta hai saat dekh kar

nashsha ke asbab-e-tazin mein bhi nashsha hai zarur

meri aankhen chaDh gain mai-KHane ki chhat dekh kar

ab nahin nazuk-mizaji se tawajjoh ka dimagh

ai ajal aana kabhi hangam-e-fursat dekh kar

wo muwahhid hun na rakkha dusre se ittihad

ruh ne chhoDa badan ko zidd-e-wahdat dekh kar

KHun-e-bulbul se magar sincha hai bagh-e-dahr ko

hum lahu barsate hain phulon ki rangat dekh kar

tere bande sar jhukate hain buton ke samne

sajde karta hun ilahi teri qudarat dekh kar

zaKHmi-e-tegh-e-taghaful par nazar jamti nahin

chashm-e-sozan band hoti hai jarahat dekh kar

ji laga kar ye ghazal kis tarah kahiye ai 'munir'

bujh gaya dil kuch-e-manzil ki azimat dekh kar