haal na puchho roz-o-shab ka koi anokhi baat nahin

haal na pūchho roz-o-shab kā koī anokhī baat nahīñ

din ko kaise raat kaheñ ham raat bhī ab to raat nahīñ

lagne ko to sehn-e-chaman meñ donoñ achchhe lagte haiñ

kāñToñ meñ jo apnā-pan hai phūloñ meñ vo baat nahīñ

dil se bhulā to deñ ham un ko lekin is ko kyā kiije

sadiyoñ kī rūdād bhulānā apne bas kī baat nahīñ

gulshan gulshan shāḳh o shajar par roz nasheman jalte haiñ

kis ne kahā thā mausam badlā agle se hālāt nahīñ

ek zarā sī baat pe kyuuñ hai itnā hañgāma 'mumtāz'

shīsha-e-dil hī to TuuTā hai aur to koī baat nahīñ

haal na puchho roz-o-shab ka koi anokhi baat nahin

din ko kaise raat kahen hum raat bhi ab to raat nahin

lagne ko to sehn-e-chaman mein donon achchhe lagte hain

kanTon mein jo apna-pan hai phulon mein wo baat nahin

dil se bhula to den hum un ko lekin is ko kya kije

sadiyon ki rudad bhulana apne bas ki baat nahin

gulshan gulshan shaKH o shajar par roz nasheman jalte hain

kis ne kaha tha mausam badla agle se haalat nahin

ek zara si baat pe kyun hai itna hangama 'mumtaz'

shisha-e-dil hi to TuTa hai aur to koi baat nahin