haal par mere ai naseh-e-mohtaram aapko kam se kam sochna chahiye

haal par mere ai nāseh-e-mohtaram aap ko kam se kam sochnā chāhiye

mere pahlū meñ dil dil meñ furqat kā ġham aap ko kam se kam sochnā chāhiye

dil ko tark-e-ta.alluq to manzūr hai ye magar koshish-e-zabt se duur hai

mujh pe karne se pahle ye taaza sitam aap ko kam se kam sochnā chāhiye

ḳhud usūloñ kā apne parastār huuñ bāhamī tafraqoñ se maiñ bezār huuñ

rind-mashrab huuñ maiñ ahl-e-dair-o-haram aap ko kam se kam sochnā chāhiye

yuuñ na zulfoñ ko shānoñ pe bikhrā.iye in ko suljhā.iye in ko suljhā.iye

jaan leñge kisī kī ye zulfoñ ke ḳham aap ko kam se kam sochnā chāhiye

yuuñ kināre pe liije na añgḌā.iyāñ yuuñ nahātī haiñ paanī meñ parchhā.iyāñ

is kināre pe hairat-zada se haiñ ham aap ko kam se kam sochnā chāhiye

aaj vaqt-e-sahar aur ba-vaqt-e-azāñ mai-kade kī taraf jā rahe ho kahāñ

keh rahe haiñ ye sab 'āsī'-e-mohtaram aap ko kam se kam sochnā chāhiye

haal par mere ai naseh-e-mohtaram aap ko kam se kam sochna chahiye

mere pahlu mein dil dil mein furqat ka gham aap ko kam se kam sochna chahiye

dil ko tark-e-talluq to manzur hai ye magar koshish-e-zabt se dur hai

mujh pe karne se pahle ye taza sitam aap ko kam se kam sochna chahiye

KHud usulon ka apne parastar hun bahami tafraqon se main bezar hun

rind-mashrab hun main ahl-e-dair-o-haram aap ko kam se kam sochna chahiye

yun na zulfon ko shanon pe bikhraiye in ko suljhaiye in ko suljhaiye

jaan lenge kisi ki ye zulfon ke KHam aap ko kam se kam sochna chahiye

yun kinare pe lije na angDaiyan yun nahati hain pani mein parchhaiyan

is kinare pe hairat-zada se hain hum aap ko kam se kam sochna chahiye

aaj waqt-e-sahar aur ba-waqt-e-azan mai-kade ki taraf ja rahe ho kahan

keh rahe hain ye sab 'asi'-e-mohtaram aap ko kam se kam sochna chahiye