haalanki nazar aate hain sab humse ziyaada

hālāñki nazar aate haiñ sab ham se ziyāda

kis ko hai magar jiine kā Dhab ham se ziyāda

ham sub.h ke ḳhurshīd se rakhte haiñ ta'alluq

hogā kise andāza-e-shab ham se ziyāda

māñge ke ujāloñ pe uchhaltā nahīñ koī

hai chāñd pe sūraj kā adab ham se ziyāda

kāġhaz pe suḳhan koī jo zinda ho to jāneñ

haañ she'r to kah lete haiñ sab ham se ziyāda

ā.īna dikhāne meñ bhī pīchhe nahīñ rahte

pūchho ho agar nām-o-nasab ham se ziyāda

inkār nahīñ shahr ke fankāroñ kā lekin

sīkhā hī nahīñ harf-e-adab ham se ziyāda

ham gaañv se qasbe meñ 'ra.īs' aa.e haiñ lekin

khulte nahīñ fankāroñ ke lab ham se ziyāda

haalanki nazar aate hain sab hum se ziyaada

kis ko hai magar jine ka Dhab hum se ziyaada

hum subh ke KHurshid se rakhte hain ta'alluq

hoga kise andaza-e-shab hum se ziyaada

mange ke ujalon pe uchhalta nahin koi

hai chand pe suraj ka adab hum se ziyaada

kaghaz pe suKHan koi jo zinda ho to jaanen

han she'r to kah lete hain sab hum se ziyaada

aaina dikhane mein bhi pichhe nahin rahte

puchho ho agar nam-o-nasab hum se ziyaada

inkar nahin shahr ke fankaron ka lekin

sikha hi nahin harf-e-adab hum se ziyaada

hum ganw se qasbe mein 'rais' aae hain lekin

khulte nahin fankaron ke lab hum se ziyaada