haalat sazgar banane mein rah gaya

hālāt sāzgār banāne meñ rah gayā

vo apnā bār-e-zīst uThāne meñ rah gayā

duniyā ke saath chal na sakā vo ziyāñ-nasīb

vo gosha-gīr apne Thikāne meñ rah gayā

sūraj ne ek baar pukārā to thā use

vo apne zehn-o-dil ko jagāne meñ rah gayā

jiine kā hausla jo mire dil meñ thā kabhī

shāyad kisī guzishta zamāne meñ rah gayā

ḳhud apnī manziloñ ke tajassus se be-ḳhabar

vo dūsroñ ko raah dikhāne meñ rah gayā

vo mahv-e-guftugū the kisī aur se 'kañval'

maiñ un ko apnī baat sunāne meñ rah gayā

haalat sazgar banane mein rah gaya

wo apna bar-e-zist uThane mein rah gaya

duniya ke sath chal na saka wo ziyan-nasib

wo gosha-gir apne Thikane mein rah gaya

suraj ne ek bar pukara to tha use

wo apne zehn-o-dil ko jagane mein rah gaya

jine ka hausla jo mere dil mein tha kabhi

shayad kisi guzishta zamane mein rah gaya

KHud apni manzilon ke tajassus se be-KHabar

wo dusron ko rah dikhane mein rah gaya

wo mahw-e-guftugu the kisi aur se 'kanwal'

main un ko apni baat sunane mein rah gaya