haalat jo yahi ai dil-e-nashad rahegi

hālat jo yahī ai dil-e-nāshād rahegī

bastī tire armānoñ kī ābād rahegī

is husn-parastī kā yahī hashr hai honā

kul umr mirī ishq meñ barbād rahegī

miT jā.eñge duniyā se bhī ham diid ke guzre

gar ai but-e-kāfir yahī be-dād rahegī

kis jī se bhulā.ūñgā tujhe ai ruḳh-e-jānāñ

tā-roz-e-abad mujh ko tirī yaad rahegī

ik umr-e-asīrī hī sahī jism meñ ai ruuh

daa.im to na ye qaid kī mī.ād rahegī

lab tak nahīñ aa.egā tire naam bhī merā

par dil meñ lagātār mirī yaad rahegī

ik dasht-e-junūñ se dil-e-vahshī ko nikālā

'rahbar' ye tirī rāhbarī yaad rahegī

haalat jo yahi ai dil-e-nashad rahegi

basti tere armanon ki aabaad rahegi

is husn-parasti ka yahi hashr hai hona

kul umr meri ishq mein barbaad rahegi

miT jaenge duniya se bhi hum did ke guzre

gar ai but-e-kafir yahi be-dad rahegi

kis ji se bhulaunga tujhe ai ruKH-e-jaanan

ta-roz-e-abad mujh ko teri yaad rahegi

ek umr-e-asiri hi sahi jism mein ai ruh

daim to na ye qaid ki miad rahegi

lab tak nahin aaega tere nam bhi mera

par dil mein lagatar meri yaad rahegi

ek dasht-e-junun se dil-e-wahshi ko nikala

'rahbar' ye teri rahbari yaad rahegi