han bikharne de tasalli se dil-e-bismil mujhe

haañ bikharne de tasallī se dil-e-bismil mujhe

ai dhaḌakte dil Thahar jā mil ga.ī manzil mujhe

abr-e-naisāñ chādar-e-shaffāf bar mahmil mujhe

chāñd kyā hai bas kisī ruḳhsār kā ik til mujhe

zalzale har saañs meñ har har nafas karb-e-hayāt

chain se jiine na degā iztirāb-e-dil mujhe

ab ye mere zehn kā badlāv hai yā bebasī

jaane kyoñ vo sang-dil lagtā hai dariyā-dil mujhe

sabz gahre rang kī chādar lapeTe kohsār

ḳhizr-sāmāñ aa kabhī in vādiyoñ meñ mil mujhe

āzmātā hai magar ye ḳhush-nasībī kam nahīñ

us ne samjhā hai jo apne pyaar ke qābil mujhe

vaqt aane de pasīna aa.egā har mauj ko

kyoñ samajhtā hai koī kaTtā huā sāhil mujhe

sar hathelī par liye jab maiñ sar-e-maqtal gayā

dekhtā thā dam-ba-ḳhud ḳhanjar-ba-kaf qātil mujhe

fitna-sāmānī ke din sāġhar-ba-lab shīsha-ba-dast

maut kā sāmāñ na ho jaa.e tirī mahfil mujhe

aaj bhī shāhid hai 'bazmī' vādī-e-jabrālTar

kashtiyāñ apnī jalā.īñ tab milā sāhil mujhe

han bikharne de tasalli se dil-e-bismil mujhe

ai dhaDakte dil Thahar ja mil gai manzil mujhe

abr-e-naisan chadar-e-shaffaf bar mahmil mujhe

chand kya hai bas kisi ruKHsar ka ek til mujhe

zalzale har sans mein har har nafas karb-e-hayat

chain se jine na dega iztirab-e-dil mujhe

ab ye mere zehn ka badlaw hai ya bebasi

jaane kyon wo sang-dil lagta hai dariya-dil mujhe

sabz gahre rang ki chadar lapeTe kohsar

KHizr-saman aa kabhi in wadiyon mein mil mujhe

aazmata hai magar ye KHush-nasibi kam nahin

us ne samjha hai jo apne pyar ke qabil mujhe

waqt aane de pasina aaega har mauj ko

kyon samajhta hai koi kaTta hua sahil mujhe

sar hatheli par liye jab main sar-e-maqtal gaya

dekhta tha dam-ba-KHud KHanjar-ba-kaf qatil mujhe

fitna-samani ke din saghar-ba-lab shisha-ba-dast

maut ka saman na ho jae teri mahfil mujhe

aaj bhi shahid hai 'bazmi' wadi-e-jabralTar

kashtiyan apni jalain tab mila sahil mujhe