han jhuT hai wo jaan se tum par fida nahin

haañ jhuuT hai vo jaan se tum par fidā nahīñ

sach kah rahe ho ġhair kā ye hausla nahīñ

yād-e-butāñ nahīñ ki ḳhayāl-e-ḳhudā nahīñ

sab kuchh bashar ke dil meñ hai ai shaiḳh kyā nahīñ

vāqif nahīñ ho tum abhī hāl-e-raqīb se

maiñ ne burā kahā jo use kyā burā nahīñ

Thahre raho ki baat hī hogī tamām raat

Darte ho kyoñ kuchh aur mirā mudda.ā nahīñ

bhūlī bahisht meñ bhī na añgūr kī mujhe

jab pī mai-e-tahūr kahā vo mazā nahīñ

puurī na kar jo vasl kī ḳhvāhish to qatl kar

kyā terī tarah teġh bhī hājat-ravā nahīñ

ik maiñ huuñ apne dil meñ tujhe dekhtā huuñ roz

ik tū hai muḌ ke merī taraf dekhtā nahīñ

pahle to us ne vasl kā iqrār kar liyā

phir thoḌī der soch ke kahne lagā nahīñ

o sone vaale sone na degī tujhe kabhī

ye merī āh-e-garm hai bād-e-sabā nahīñ

jaao na mudda.ī kī mulāqāt ke liye

tum aao yā na aao ye matlab mirā nahīñ

ai dil kidhar hai kūcha-e-gesū se de sadā

DhūñDhuñ kahāñ añdhere meñ kuchh sūjhtā nahīñ

saa.e kā bhī pata nahīñ vo aa.e is tarah

sajde kahāñ karūñ ki kahīñ naqsh-e-pā nahīñ

sābit hai jurm-e-ishq to dāvā-e-ishq se

ham kis tarah kaheñ ki hamārī ḳhatā nahīñ

barsāt meñ bhī tum kabhī piite nahīñ 'fahīm'

aisā bhī ab pasand mujhe ittiqā nahīñ

han jhuT hai wo jaan se tum par fida nahin

sach kah rahe ho ghair ka ye hausla nahin

yaad-e-butan nahin ki KHayal-e-KHuda nahin

sab kuchh bashar ke dil mein hai ai shaiKH kya nahin

waqif nahin ho tum abhi haal-e-raqib se

main ne bura kaha jo use kya bura nahin

Thahre raho ki baat hi hogi tamam raat

Darte ho kyon kuchh aur mera muddaa nahin

bhuli bahisht mein bhi na angur ki mujhe

jab pi mai-e-tahur kaha wo maza nahin

puri na kar jo wasl ki KHwahish to qatl kar

kya teri tarah tegh bhi hajat-rawa nahin

ek main hun apne dil mein tujhe dekhta hun roz

ek tu hai muD ke meri taraf dekhta nahin

pahle to us ne wasl ka iqrar kar liya

phir thoDi der soch ke kahne laga nahin

o sone wale sone na degi tujhe kabhi

ye meri aah-e-garm hai baad-e-saba nahin

jao na muddai ki mulaqat ke liye

tum aao ya na aao ye matlab mera nahin

ai dil kidhar hai kucha-e-gesu se de sada

DhunDhun kahan andhere mein kuchh sujhta nahin

sae ka bhi pata nahin wo aae is tarah

sajde kahan karun ki kahin naqsh-e-pa nahin

sabit hai jurm-e-ishq to dawa-e-ishq se

hum kis tarah kahen ki hamari KHata nahin

barsat mein bhi tum kabhi pite nahin 'fahim'

aisa bhi ab pasand mujhe ittiqa nahin