han kabhi hai kabhi hai yar nahin

haañ kabhī hai kabhī hai yaar nahīñ

haañ nahīñ kā kuchh e.atibār nahīñ

sar meñ saudā abas hai duniyā kā

ghar kuchh aisā ye pā.edār nahīñ

qātil abrū se tere Darte haiñ

varna teġh aisī ābdār nahīñ

sang-e-tiflāñ se is liye Dar hai

sar-e-shorīda pā.edār nahīñ

chale jaate haiñ rah-ravān-e-adam

saath vāloñ kā e.atibār nahīñ

phir kisī zulf kā huā saudā

be-sabab dil ko intishār nahīñ

ham piyeñ ḳhud pilā.e gar saaqī

ahd yaañ aisā ustuvār nahīñ

un ke qaul-o-qarār ke hāthoñ

kaun dil hai jo be-qarār nahīñ

dekh kar tujh ko hai ye sannāTā

dil bhī pahlū meñ be-qarār nahīñ

mash.al-e-dāġh saath jā.egī

ḳhauf-e-tārīkī-e-mazār nahīñ

dekheñ kyā ho maiñ huuñ barahna-pā

be-ḳhalish koī nok-e-ḳhār nahīñ

kis ke kahne se tark-e-mai 'tālib'

ḳhaam hai shaiḳh puḳhta-kār nahīñ

han kabhi hai kabhi hai yar nahin

han nahin ka kuchh eatibar nahin

sar mein sauda abas hai duniya ka

ghar kuchh aisa ye paedar nahin

qatil abru se tere Darte hain

warna tegh aisi aabdar nahin

sang-e-tiflan se is liye Dar hai

sar-e-shorida paedar nahin

chale jate hain rah-rawan-e-adam

sath walon ka eatibar nahin

phir kisi zulf ka hua sauda

be-sabab dil ko intishaar nahin

hum piyen KHud pilae gar saqi

ahd yan aisa ustuwar nahin

un ke qaul-o-qarar ke hathon

kaun dil hai jo be-qarar nahin

dekh kar tujh ko hai ye sannaTa

dil bhi pahlu mein be-qarar nahin

mashal-e-dagh sath jaegi

KHauf-e-tariki-e-mazar nahin

dekhen kya ho main hun barahna-pa

be-KHalish koi nok-e-KHar nahin

kis ke kahne se tark-e-mai 'talib'

KHam hai shaiKH puKHta-kar nahin