han KHud-azar hain danista saza chahte hain

haañ ḳhud-āzār haiñ dānista sazā chāhte haiñ

aisī duniyā se to ham karb-o-balā chāhte haiñ

ham pe khā khā ke taras pūchh rahā hai qātil

taḳhta hai teġh hai farmā.iye kyā chāhte haiñ

kyā koī biit chuke ġham ke badalte mausam

sānehe jo na hue vo bhī huā chāhte haiñ

nūr-e-mahtāb se ham muuñd ke āñkheñ apnī

ātish-afshānī ḳhāvar kī ziyā chāhte haiñ

vo ki Thukrāte haiñ ma.asūm farishtoñ kā libās

apne shaitān se ik chust qabā chāhte haiñ

kaun kahtā huā zindān-e-badan se niklā

qaid meñ rakh ke bhī ham se ye vafā chāhte haiñ

apnī rūdād kā raavī hai ye sotā huā ghar

ik palak niiñd nahīñ chaar bajā chāhte haiñ

mar miTā jin ke liye jam.a kiyā māl-o-manāl

vahī jiinā na rahe ab virsā chāhte haiñ

maut kā ḳhauf bhī hotā to mafar kab miltā

phir ye ham kis liye darmān-o-davā chāhte haiñ

band karne do hameñ band havā ke pañkhe

is farā-ḳhez se jañgal kī havā chāhte haiñ

zindagī tujh ko bahut kuchh to samajh hī ga.e ham

kuchh hijābāt haiñ baaqī so uThā chāhte haiñ

nau-bahārāñ kī nazāhat pe tarāvat pe na jā

kuchh shagūfe haiñ na.e bhī jo khilā chāhte haiñ

kaj-ravāñ naqsh-e-kaf-e-pā ko miTāne ke ba.ad

kitne saada haiñ ki naqsh-e-kaf-e-pā chāhte haiñ

ma.arka ho to yahāñ koī maraz lāhaq hai

lashkarī bhī haiñ to kyā bāñg-e-darā chāhte haiñ

chait jaao un ujāloñ ko pas-andāz karo

kuchh diye haiñ jo koī dam meñ bujhā chāhte haiñ

āsmāñ par vahī rah jaa.eñ na taare hoñ na chāñd

aur to aur ye shams-ul-ulamā chāhte haiñ

sab se mumtāz rahe kāḳh-e-muallā un kā

chār-sū jhoñpaḌiyāñ bhī ra.ūsā chāhte haiñ

ghar se nikle haiñ kafan-posh samajh-būjh ke ham

ki vahī sab se baḌe haiñ jo bhalā chāhte haiñ

ye zamīñ diije hameñ kachche falak-paimā.ī

ham huā chāhte haiñ āb-e-ḳhalā chāhte haiñ

ḳhush karūñ kitnoñ ko kis kis ko banā.ūñ dushman

saare bhagvān mirī parārthnā chāhte haiñ

dast-kash bhī rahe ḳhushūdī-e-duniyā se to kyā

vahī kab ḳhush hai miyāñ jis kī razā chāhte haiñ

ḳhud-farebī kī parastārī-e-gum-karda-rahāñ

ki par-e-kāh haiñ aur kāh-rubā chāhte haiñ

ham jahāñgīr haiñ ik nūr-e-jahāñ rakhte haiñ

us kī chāleñ to nahīñ us kī adā chāhte haiñ

ḳhidmat-e-sher-o-adab kā to hameñ da.avā hai

koī kyā jaane ki taskīn-e-anā chāhte haiñ

han KHud-azar hain danista saza chahte hain

aisi duniya se to hum karb-o-bala chahte hain

hum pe kha kha ke taras puchh raha hai qatil

taKHta hai tegh hai farmaiye kya chahte hain

kya koi bit chuke gham ke badalte mausam

sanehe jo na hue wo bhi hua chahte hain

nur-e-mahtab se hum mund ke aankhen apni

aatish-afshani KHawar ki ziya chahte hain

wo ki Thukraate hain masum farishton ka libas

apne shaitan se ek chust qaba chahte hain

kaun kahta hua zindan-e-badan se nikla

qaid mein rakh ke bhi hum se ye wafa chahte hain

apni rudad ka rawi hai ye sota hua ghar

ek palak nind nahin chaar baja chahte hain

mar miTa jin ke liye jama kiya mal-o-manal

wahi jina na rahe ab wirsa chahte hain

maut ka KHauf bhi hota to mafar kab milta

phir ye hum kis liye darman-o-dawa chahte hain

band karne do hamein band hawa ke pankhe

is fara-KHez se jangal ki hawa chahte hain

zindagi tujh ko bahut kuchh to samajh hi gae hum

kuchh hijabaat hain baqi so uTha chahte hain

nau-bahaaran ki nazahat pe tarawat pe na ja

kuchh shagufe hain nae bhi jo khila chahte hain

kaj-rawan naqsh-e-kaf-e-pa ko miTane ke baad

kitne sada hain ki naqsh-e-kaf-e-pa chahte hain

marka ho to yahan koi maraz lahaq hai

lashkari bhi hain to kya bang-e-dara chahte hain

chait jao un ujalon ko pas-andaz karo

kuchh diye hain jo koi dam mein bujha chahte hain

aasman par wahi rah jaen na tare hon na chand

aur to aur ye shams-ul-ulama chahte hain

sab se mumtaz rahe kaKH-e-mualla un ka

chaar-su jhonpaDiyan bhi rausa chahte hain

ghar se nikle hain kafan-posh samajh-bujh ke hum

ki wahi sab se baDe hain jo bhala chahte hain

ye zamin dije hamein kachche falak-paimai

hum hua chahte hain aab-e-KHala chahte hain

KHush karun kitnon ko kis kis ko banaun dushman

sare bhagwan meri pararthna chahte hain

dast-kash bhi rahe KHushudi-e-duniya se to kya

wahi kab KHush hai miyan jis ki raza chahte hain

KHud-farebi ki parastari-e-gum-karda-rahan

ki par-e-kah hain aur kah-ruba chahte hain

hum jahangir hain ek nur-e-jahan rakhte hain

us ki chaalen to nahin us ki ada chahte hain

KHidmat-e-sher-o-adab ka to hamein dawa hai

koi kya jaane ki taskin-e-ana chahte hain