han pahle Darte the par ab mazaq karte hain

haañ pahle Darte the par ab mazāq karte haiñ

hamāre saath yahāñ sab mazāq karte haiñ

ham apnī zaat kī sanjīdgī pe hañste haiñ

usuul bante haiñ vo jab mazāq karte haiñ

mujhe yaqīn to honā ki maiñ yaqīnan huuñ

maiñ muntazir huuñ ki vo kab mazāq karte haiñ

hameñ qubūl tahajjud ke vaqt se pahle

ham apnī zaat se har shab mazāq karte haiñ

shab-e-firāq sahīfe meñ jab hai Dhal jaatī

jo ashk zinda hoñ vo tab mazāq karte haiñ

ḳhud apne jaisā unheñ bhī na saḳht-gīr banā

kabhī kabhī to tire lab mazāq karte haiñ

maiñ be-salīqa ḳhayāloñ kā mo.atadil misra.a

suḳhanvarī ke jo haiñ Dhab mazāq karte haiñ

hameñ bhī shauq hai dekheñ hañsī ko bante hue

zarā batāo nā vo kab mazāq karte haiñ

maiñ uñgliyoñ ke tasarruf meñ raushnī rakh duuñ

badan ke zāviye yārab mazāq karte haiñ

agar na puure taqāze hoñ adl ke 'kāzim'

to kursiyoñ se bhī mansab mazāq karte haiñ

han pahle Darte the par ab mazaq karte hain

hamare sath yahan sab mazaq karte hain

hum apni zat ki sanjidgi pe hanste hain

usul bante hain wo jab mazaq karte hain

mujhe yaqin to hona ki main yaqinan hun

main muntazir hun ki wo kab mazaq karte hain

hamein qubul tahajjud ke waqt se pahle

hum apni zat se har shab mazaq karte hain

shab-e-firaq sahife mein jab hai Dhal jati

jo ashk zinda hon wo tab mazaq karte hain

KHud apne jaisa unhen bhi na saKHt-gir bana

kabhi kabhi to tere lab mazaq karte hain

main be-saliqa KHayalon ka moatadil misra

suKHanwari ke jo hain Dhab mazaq karte hain

hamein bhi shauq hai dekhen hansi ko bante hue

zara batao na wo kab mazaq karte hain

main ungliyon ke tasarruf mein raushni rakh dun

badan ke zawiye yarab mazaq karte hain

agar na pure taqaze hon adl ke 'kazim'

to kursiyon se bhi mansab mazaq karte hain