han ye sach hai ki wo har dil mein makin hota hai

haañ ye sach hai ki vo har dil meñ makīñ hotā hai

ye ġhalat hai ki vo hotā hī nahīñ hotā hai

terā hī husn numāyāñ hai har ik insāñ meñ

har bashar meñ tire hone kā yaqīn hotā hai

aur baḌh jaatā hai kuchh shauq-e-talab rahrau kā

jab musāfir koī manzil ke qarīb hotā hai

husn kyā chiiz hai nazroñ kā fareb-e-rangīñ

dekhiye shauq se jis ko vo hasīñ hotā hai

chupke chupke jo huā kartī haiñ dil se bāteñ

dil ke parde meñ koī parda-nashīñ hotā hai

us ke dīdār kā har shaḳhs talabgār na ho

sāmne sab ke koī parda nahīñ hotā hai

jaise murjhā.ī huī sī ho kalī gulshan meñ

'ishq meñ aisā har ik qalb-e-hazīñ hotā hai

muñh se iqrār karo haañ to kaho bolo to

vasl kā vā'da ishāroñ se nahīñ hotā hai

shaah bhī haiñ isī duniyā meñ gadā bhī 'ārif'

koī saa.il to koī taḳht-nashīñ hotā hai

han ye sach hai ki wo har dil mein makin hota hai

ye ghalat hai ki wo hota hi nahin hota hai

tera hi husn numayan hai har ek insan mein

har bashar mein tere hone ka yaqin hota hai

aur baDh jata hai kuchh shauq-e-talab rahrau ka

jab musafir koi manzil ke qarib hota hai

husn kya chiz hai nazron ka fareb-e-rangin

dekhiye shauq se jis ko wo hasin hota hai

chupke chupke jo hua karti hain dil se baaten

dil ke parde mein koi parda-nashin hota hai

us ke didar ka har shaKHs talabgar na ho

samne sab ke koi parda nahin hota hai

jaise murjhai hui si ho kali gulshan mein

'ishq mein aisa har ek qalb-e-hazin hota hai

munh se iqrar karo han to kaho bolo to

wasl ka wa'da ishaaron se nahin hota hai

shah bhi hain isi duniya mein gada bhi 'arif'

koi sail to koi taKHt-nashin hota hai