hanpte mausam taDaKHte TuTte din kaT gae

hāñpte mausam taḌaḳhte TūTte din kaT ga.e

kaT ga.e jalte pighalte khaulte din kaT ga.e

chhāñv kab aa.ī mayassar dasht-e-imkānāt meñ

bhāgte sāyoñ ke pīchhe bhāgte din kaT ga.e

chār-sū phaile the khāre pāniyoñ ke silsile

sāhiloñ se duur ubharte Dūbte din kaT ga.e

kab kisī ġhurfe se utrī koī nā-mastūr satr

harf-o-mā’nī kī kamandeñ Dālte din kaT ga.e

kaT ga.e kuchh roz-o-shab karte raqam āshob-e-'ahd

kuchh kaḌe vaqtoñ kī kaḌiyāñ kāTte din kaT ga.e

vo ḳhunuk-rut lauT kar aa.ī na phir bītīñ ruteñ

aag taptī sā'atoñ kī tāpte din kaT ga.e

zikr se ab fā.eda kyā yaar jaise bhī kaTe

sard sāñsoñ meñ siyāhī gholte din kaT ga.e

aaj tak sochā nahīñ thā ab ḳhayāl aane lagā

kin galī kūchoñ meñ phirte ghūmte din kaT ga.e

dard kī karvaT hai kyā jaane vo kyā jis ke 'bashīr'

be-ḳhayālī meñ hī sote jāgte din kaT ga.e

hanpte mausam taDaKHte TuTte din kaT gae

kaT gae jalte pighalte khaulte din kaT gae

chhanw kab aai mayassar dasht-e-imkanat mein

bhagte sayon ke pichhe bhagte din kaT gae

chaar-su phaile the khaare paniyon ke silsile

sahilon se dur ubharte Dubte din kaT gae

kab kisi ghurfe se utri koi na-mastur satr

harf-o-ma’ni ki kamanden Dalte din kaT gae

kaT gae kuchh roz-o-shab karte raqam aashob-e-'ahd

kuchh kaDe waqton ki kaDiyan kaTte din kaT gae

wo KHunuk-rut lauT kar aai na phir bitin ruten

aag tapti sa'aton ki tapte din kaT gae

zikr se ab faeda kya yar jaise bhi kaTe

sard sanson mein siyahi gholte din kaT gae

aaj tak socha nahin tha ab KHayal aane laga

kin gali kuchon mein phirte ghumte din kaT gae

dard ki karwaT hai kya jaane wo kya jis ke 'bashir'

be-KHayali mein hi sote jagte din kaT gae