hasil hamein bhi qurbaten thi aap ki kabhi

hāsil hameñ bhī qurbateñ thī aap kī kabhī

ya.anī hameñ bhī raas thī ye zindagī kabhī

ham bhī ba-nām-e-dostī khāte rahe fareb

ham par bhī thā ye ālam-e-dīvāngī kabhī

ham bhī the kāmyāb mohabbat meñ dosto

ham par bhī ya.anī vo nigah-e-lutf thī kabhī

pahroñ kisī kī yaad meñ kho.e rahe haiñ ham

ġham-hā-e-zindagī se jo fursat milī kabhī

ham aur un se shikva-e-zor-e-sitam ġhalat

majbūr ho ga.e haiñ so vo bhī kabhī kabhī

un se bichhaḌ ke umr-bhar dete rahe fareb

ham zindagī ko aur hameñ zindagī kabhī

vo aur mehrbān mire hāl-e-zār par

kyā kyā kamāl karte haiñ ye log bhī kabhī

apnī tabāhiyoñ kā uḌāyā hai ḳhud mazāq

ḳhud qahqahe lagā.e haiñ ham ne kabhī kabhī

ḳhud se farār chāhne vaale mujhe bhī dekh

har saḳhtī-e-hayāt sahī uf na kī kabhī

māyūs is qadar bhī nahīñ zindagī se ham

zinda rahe to raas bhī aa jā.egī kabhī

'āsī' tamām umr rahīñ āh-o-zāriyāñ

dekhī na tere hoñToñ pe ham ne hañsī kabhī

hasil hamein bhi qurbaten thi aap ki kabhi

yani hamein bhi ras thi ye zindagi kabhi

hum bhi ba-nam-e-dosti khate rahe fareb

hum par bhi tha ye aalam-e-diwangi kabhi

hum bhi the kaamyab mohabbat mein dosto

hum par bhi yani wo nigah-e-lutf thi kabhi

pahron kisi ki yaad mein khoe rahe hain hum

gham-ha-e-zindagi se jo fursat mili kabhi

hum aur un se shikwa-e-zor-e-sitam ghalat

majbur ho gae hain so wo bhi kabhi kabhi

un se bichhaD ke umr-bhar dete rahe fareb

hum zindagi ko aur hamein zindagi kabhi

wo aur mehrban mere haal-e-zar par

kya kya kamal karte hain ye log bhi kabhi

apni tabahiyon ka uDaya hai KHud mazaq

KHud qahqahe lagae hain hum ne kabhi kabhi

KHud se farar chahne wale mujhe bhi dekh

har saKHti-e-hayat sahi uf na ki kabhi

mayus is qadar bhi nahin zindagi se hum

zinda rahe to ras bhi aa jaegi kabhi

'asi' tamam umr rahin aah-o-zariyan

dekhi na tere honTon pe hum ne hansi kabhi