hath aa gaya hai jab se shuur-e-KHudi ka sanp

haath aa gayā hai jab se shu.ūr-e-ḳhudī kā saañp

siine pe loTtā hai ġham-e-zindagī kā saañp

apne badan se ḳhol anā kā utaar kar

phunkārtā hai shām-o-sahar āgahī kā saañp

maiñ kheltā huuñ us se magar jāntā huuñ ye

ik din mujhe Dasegā na.ī raushnī kā saañp

kyuuñ man kā mor pañkh na apne sameT le

āñgan meñ kheltā hai ġham-e-āshiqī kā saañp

mauj-e-sarāb kā bhī pata duur tak nahīñ

shiddat se Das rahā hai mujhe tishnagī kā saañp

tahzīb kā khañDar hai nigāhoñ ke sāmne

vo reñgtā hai dekhiye ik ḳhāmushī kā saañp

kyuuñ nīlkañTh ban ke na pī jā.ūñ us ko maiñ

jo zahr ugal rahā hai ġham-e-āgahī kā saañp

hath aa gaya hai jab se shuur-e-KHudi ka sanp

sine pe loTta hai gham-e-zindagi ka sanp

apne badan se KHol ana ka utar kar

phunkarta hai sham-o-sahar aagahi ka sanp

main khelta hun us se magar jaanta hun ye

ek din mujhe Dasega nai raushni ka sanp

kyun man ka mor pankh na apne sameT le

aangan mein khelta hai gham-e-ashiqi ka sanp

mauj-e-sarab ka bhi pata dur tak nahin

shiddat se Das raha hai mujhe tishnagi ka sanp

tahzib ka khanDar hai nigahon ke samne

wo rengta hai dekhiye ek KHamushi ka sanp

kyun nilkanTh ban ke na pi jaun us ko main

jo zahr ugal raha hai gham-e-agahi ka sanp