hath aaya aasman to zamin ka nahin raha

haath aaya āsmāñ to zamīñ kā nahīñ rahā

phir ye huā vo shaḳhs kahīñ kā nahīñ rahā

ab ke muhājiroñ kā vo relā thā gaañv meñ

chhoTā sā ek makāñ bhī makīñ kā nahīñ rahā

apne paḌosiyoñ pe mujhe e'timād hai

ye vaqt bhā.iyoñ pe yaqīn kā nahīñ rahā

dekhā to saare log ibādat-guzār the

parkhā to koī ḳhuld-e-barīñ kā nahīñ rahā

maiñ ne tamām umr saḳhāvat meñ kaaT dī

mere laboñ pe harf nahīñ kā nahīñ rahā

zulmāt-e-zindagī meñ bhaTakte rahe 'zafar'

jab saath ik sitāra-jabīñ kā nahīñ rahā

hath aaya aasman to zamin ka nahin raha

phir ye hua wo shaKHs kahin ka nahin raha

ab ke muhajiron ka wo rela tha ganw mein

chhoTa sa ek makan bhi makin ka nahin raha

apne paDosiyon pe mujhe e'timad hai

ye waqt bhaiyon pe yaqin ka nahin raha

dekha to sare log ibaadat-guzar the

parkha to koi KHuld-e-barin ka nahin raha

main ne tamam umr saKHawat mein kaT di

mere labon pe harf nahin ka nahin raha

zulmat-e-zindagi mein bhaTakte rahe 'zafar'

jab sath ek sitara-jabin ka nahin raha