hath kaTte hain jahan sina-o-sar khulte hain

haath kaTte haiñ jahāñ sīna-o-sar khulte haiñ

aise māhaul meñ ham ahl-e-hunar khulte haiñ

din nikaltā ho jahāñ ḳhauf kā neza ban kar

aisī bastī meñ kahāñ raat ko dar khulte haiñ

kaise aaseb kā saaya hai mire raste par

gard chhaTtī hai na asrār-e-safar khulte haiñ

ham ne ik umr guzārī hai inhī ḳhvāboñ meñ

ab qafas TūTtā hai aur abhī par khulte haiñ

ruḳh pe gulshan ke khuleñ jis ke darīche aksar

sū-e-sahrā bhī usī shahr ke dar khulte haiñ

jin zamīnoñ pe khare log basā leñ ḳhud ko

rāste sail-e-balā ke bhī udhar khulte haiñ

ahl-e-sāhil se kaho kashf kī sūrat 'razmī'

mauj khultī hai kabhī ham pe bhañvar khulte haiñ

hath kaTte hain jahan sina-o-sar khulte hain

aise mahaul mein hum ahl-e-hunar khulte hain

din nikalta ho jahan KHauf ka neza ban kar

aisi basti mein kahan raat ko dar khulte hain

kaise aaseb ka saya hai mere raste par

gard chhaTti hai na asrar-e-safar khulte hain

hum ne ek umr guzari hai inhi KHwabon mein

ab qafas TuTta hai aur abhi par khulte hain

ruKH pe gulshan ke khulen jis ke dariche aksar

su-e-sahra bhi usi shahr ke dar khulte hain

jin zaminon pe khare log basa len KHud ko

raste sail-e-bala ke bhi udhar khulte hain

ahl-e-sahil se kaho kashf ki surat 'razmi'

mauj khulti hai kabhi hum pe bhanwar khulte hain