hath kyunkar mila nahin paya

haath kyūñkar milā nahīñ paayā

jabki sochā thā jā nahīñ paayā

der tak maiñ khaḌā rahā dar par

tum ne sochā ki aa nahīñ paayā

rahguzar meñ to saath hai jaise

tujh ko āḳhir kahāñ nahīñ paayā

maiñ ne tum ko to pā liyā lekin

maiñ ne ab tak ḳhudā nahīñ paayā

bahut paayā bhī to zamāne meñ

kuchh bhī tere sivā nahīñ paayā

maiñ ne sochā ki sab batā.ūñgā

par milā to batā nahīñ paayā

ḳhuub chāhā ki āzmā.ūñ bhī

par kabhī aazmā nahīñ paayā

tīrgī saath hī rahī har dam

sham.a koī jalā nahīñ paayā

ek hī bhuul thī magar ab tak

kis ne kis ne sazā nahīñ paayā

ho gayā huuñ judā bhale tum se

tum ko ḳhud se judā nahīñ paayā

hath kyunkar mila nahin paya

jabki socha tha ja nahin paya

der tak main khaDa raha dar par

tum ne socha ki aa nahin paya

rahguzar mein to sath hai jaise

tujh ko aaKHir kahan nahin paya

main ne tum ko to pa liya lekin

main ne ab tak KHuda nahin paya

bahut paya bhi to zamane mein

kuchh bhi tere siwa nahin paya

main ne socha ki sab bataunga

par mila to bata nahin paya

KHub chaha ki aazmaun bhi

par kabhi aazma nahin paya

tirgi sath hi rahi har dam

shama koi jala nahin paya

ek hi bhul thi magar ab tak

kis ne kis ne saza nahin paya

ho gaya hun juda bhale tum se

tum ko KHud se juda nahin paya